Ulan wala makasanta sa mibaha
JAV, BANATI! - Javier Tapulado (Banat) - January 12, 2020 - 12:00am

Alas 4:10 sa kaadlawon pukawon na ko sa akong alarm clock aron maligo, mag-ilis ug mag-ampo sa dili pa molarga paingon sa akong trabahoan. Maoy misugat sa akong pagbangon ang text message ni misis nga nagkanayon: “Tay, miuna lang kog lakaw kay Walk with Jesus ug Opening Salvo mass karon alang sa kapistahan ni Senior Santo Niño.”

Wala madugay, may mihagtob sa among atop. Abi kog mga gagmayng bato nga gilabay. Apan dihang nagsunodsunod, didto pa ko masayod nga miulan diay.

May talan-awong kulba-hinam nga misalida sa akong hunahuna. Nakita ko ang ulan gikan sa langit nga tugob sa kalimpiyo ug daw maoy tumong nga bas-on gyod ang tanang manguyog aron masayran ni Senior Santo Niño, kinsa sa mga debotos ang daling ianod ngadto sa kahadlok nga mahumod ug kinsa kadtong magpabiling isog nga makigharong bahalag mabasa.

Dinhi masukod kinsay hawod: ang gahom sa ulan, o ang gahom sa pagtuo?

Usa ka Florencio Rendon, usa kanhi ka seminarista pero naminyo ug may mga anak ug apo na, mipaambit sa iyang kasinatian sa Walk with Jesus, 2020. Matud niya, dala iyang pamilya ug usa ka apo, alas 4:00 sa kaadlawon didto na sila sa Fuente Osmeña.

Pag-ulan, wala gyud mabugnaw ang kainit sa iyang tinguha pagkuyog sa Walk with Jesus procession. Wala gani niya batia ang kabug-at sa iyang apo nga gipulipulihan nilag kugos: niya ug sa iyang asawa, gikan sa Fuente ngadto sa Basilica.

Hinuon, sama sa uban, nakapalit sab silag payong sa usa ka convenient store, diin iyang naobserbaran nga imbes manguli ang mga debotos, misamot hinuog kadaghan ang miuban sa prosesyon.

Sa aerial view, gibanabana nga moabot sa 300,000 ka deboto ang wala manumbaling sa ulan. Ang mga lusok gikan sa itaas nga usahay mohumod sa ilang dughan gipakasama nilang blessings sa Balaang Bata nga nadawat na ug may lain pang madawat sa umaabot.

Kadaghan na nila matagamtami ang milagro ni Senior Santo Niño sa ilang kinabuhi nga maoy nakapalig-og samot sa ilang pagtuo.

Busa, ang ulan wa gyod makasanta sa makusog bul-og sa katawhan nga mibaha sa tanos nga dalan gikan sa Fuente ngadto sa Basilica.

Viva, Pit Senior!

MIBAHA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with