Mapagaw na lang ug binuyag

Ang mga kadagkoan sa Liberal Party nanawagan sa administrasyon ni Presidente Duterte nga sundon ang tambag sa oposisyon mahitungod sa gubat batok sa druga kay ang pagpatay sa mga suspetsado wala gayod kuno makasulbad sa maong suliran.  Mora’g MAPAGAW na lang ang mga oposisyon og binuyag sa administrasyon.  Gawas nga dili katoohan ang grado nga ilang gihatag sa administrasyon sa pagsumpo sa suliran sa druga, daghan pa gihapon ang mitoo sa ug misalig sa atong Presidente.  Panaway pa more!

Mangilad o mailad

Pasakaan og kaso nga large scale estafa sa Mayor sa Dingalan, Aurora ang unom ka membro sa grupo nga gitawag og Worldwide Movement Development Divinity tungod sa alegasyon nga nangilad sila sa mga senior citizen sa iyang lugar.  Ang ilang modus mao ang pagpangayo og usa ka libo ka pesos nga amutan matag senior citizen unya agi’g bugti, makadawat sila ug P1 milyon ug dugang binuwan nga pension.  Pastilan ang tawo, ang kahangol sa kwarta mao gayod ang makapahitumpawak aron MAILAD o MANGILAD. Invest pa more!

Naunay sa iyang kawsa

Gikataho nga ang sakyanan ni Anti-Crime and Terrorism through Community Involvement Support (ACT-CIS) Partylist Representative Rowena Taduran gilungkab ug gikawatan didto sa parking lot sa usa ka mall sa Quezon City. Walay saksi nga nakakita sa panghitabo. Dili ba mao man unta kini ang kawsa sa iyang partylist: ang pagsumpo sa krimen diin malambigit ang komunidad? Tataw nga wala pa’y nahimo ang Kongresista mahitungod sa kawsa nga iyang girepresentahan kay naunay man gani hinoon siya sa tari. Study pa more mga Partylist!

Safety first una lage

Duha ka bata didto sa Dumanjug, pulos nagpanuigon og 5 anyos, gikataho nga nagduwa ug pistola nga kargado og buhi nga bala nga miresulta sa pagkasamad sa usa ka bata sa iyang tiil ug tuo nga dalunggan. Gisundog nila ang salida nga ilang nakita sa telebisyon. Bisan unsa pa ka-brayt ang atong kabataan, sa linghod nila’ng pangisip dili pa gayod nila masukod ang kapeligro sa mga butang nga mahimo nilang dulaan. Kanus-a pa ba kita makaamgo nga lahi ang dulaan para sa mga bata ug lahi usab ang gamit sa mga hamtong?  Safety first lang unta!

Pribilehiyo batok katungod

Taliwala sa nag-alintabo nga isyu kon angayan ba nga hatagan og bag-ong prangkisa ang ABS-CBN, namahayag si Palawan 1st Distric Representative Franz Alvarez nga ang prangkisa usa ka pribilehiyo ug dili angayan idugtong sa isyu sa kagawasan sa prensa nga usa ka batakan nga katungod.  Sakto ang kongresista; ang problema lang kay ang atong interpretasyon sa balaod ato kanunay ipahaom sa atong kagustuhan ug kabulahanan. Adunay daghang gikulbaan bahin ani nga isyu.  Abangan!