Bag-ong Tuig, panahon sa pagbag-o

Usa’g-usa nato nangandoy og kaharuhay sa pamuyo. Makakaog lami. Makapuyog desenteng balay.  Ug daghan pang matang sa lami ang gustong maangkon. Unya, natuman ba?

Akong Tatay, bisag construction worker ra to, adunay gitisok sa akong dughan. Matod niya: “Kun ikaw adunay butang nga gipangandoyng maimo, kinahanglang molihok ug maningkamot pag-ayo.  Kay kon ang hunahuna ray imong palihokon, sama ra sa nagdamgo ka sa wala. Kon gusto kang mairog, lakang gyod, o ambak. At least, wala ka magpabilin sa naandan nimong nahimutangan.

Ang lakang sa tawo lainlaig sukod. Ang ambak lainlain sab og tugpahan. Nagdepende sa gidak-on sa imong tiil ug tinguha. May higayon nga sa imong paglakang o pag-ambak, ikaw madakin-as ug malukapa.

Apan ayawg tagam. Bangon, pamapha ug padayon sa pagsungsong sa unahan. Ayaw isipa nga ang imong pagkadagma usa ka dakong babag, kondili, himoa hinuon kining bulawanong ang-ang nga maoy tikangan mo paingon sa nagpaabot nga katumanan sa imong mga pangandoy.” Bitaw, sagad sa tawo gustong madato. Pero dili motrabaho. Gusto lang maglingkod kanunay ug ang kuwarta maoy paduolon. Madahan! 

Di ba, miingon ang Ginoo nga: “Lihok, tawo, kay tabangan tika?” God is a good provider. Tanang tubag sa panginahanglan, Iya nang gibutang daan sa atong palibot. Ang ato rang buhaton mao ra ang pagpangita niini asa Niyang dapita ibutang?

Kita lang ang may deperensiya. Kay tungod sa atong kakulang og pailob, ang kahumok ra gayod natong mosurender. Labi na sa higayon, kon ang katapol nay mohari sa atong galamhan.

Tan-awa ra gud nang mga car watch boys, oh! Mga batan-on pa. Himsog og lawas. Ug puwerte pang abtika sa ilang mga senses. Haskang kusoga sa mga lakang nga moduol inig kakita nga may sakyanan nga mogawas sa giparkingang luna. Pasangil lag ayuda, pero ang tinuorayng tuyo, mangayo diay. Dili gyod maulaw, nga ang ilang gipangayoan, senior citizen na.

Hinuon, may pipila sab kanila nga tigulang na. Nagpasabot ba kini nga kontento na sila ning maong pangita hangtod sa kataposang adlaw sa ilang pagpakabuhi ning kalibotan?

 Dili pa ulahi tanan. Ning pag-abot sa Bag-ong Tuig 2020, mahimo kaayong biyaan ang tanang daotan nilang naandan ug pulihan sa matahom nga pagbag-o.