Edad Ko Halad Ko

Matag parokya dunay giimik ning mga panahona. Dinhi sa amoa sa Madridejos Alegria among gihimo ang Edad ko Halad Ko! kun pila ang imong edad mao usab ang imong ihalad.

Apan kuyog niini mao man ang mga pag-ampo kun intentions nga buot nimong ipaampo sa tuig 2020.

Mao nga daghan usab ang nipaambit sa ilang edad ngadto sa Ginoo. Sa akong bahin, ubay-ubay gyud ang basahonon apan sagdi lang kini man ang hinungdan kun nganong saulogon ang Misa matag adlaw ang pag-ampo alang sa uban nga nagkinahanglan.

Nagkadaiya ang ilang gipangayo nga mga pag-ampo. Gikan sa personal ngadto na sa mga katilingbanon. Butang nga nagpakita nga ang mga parokyano ang wala lang diay maghunahuna sa ilang kaugalingon kondili ila usab nga gihunahuna ang ubang mga tawo.

Gikan sa maayong panglawas ngadto na sa mga malinawong pagpuyo sa banay ug sa kalinaw sa tibuok nasud.

Ang kinabuhi gasa gikan sa Dios. Kun maghisgot kita og gasa dili kita deserving niini tungod kay unsa ra gud kita kun itandi sa Dios.

Apan ang Dios gugma. Ang maong gugma maoy nagtukmod kaniya nga gikan sa lapok mabuhi ug moginhawa ang lalaki ug gikan sa maong gugma gikuha gikan sa gusok sa lalaki ang babaye. Sa laktod, nahimong konektado gyud ang tanan sa sinugdan pa lang daan.

Kay gasa man kini duna kitay obligasyon nga bisan unsa nga kanato gigasa ato gyud atimanon.

Mao nga dili maayo nga atong usikan ang atong kinabuhi sa mga walay hinungdang mga balansayon nga magdala kanato ngadto sa kawalay kapaingnan ug kamatayon.

Matag tuig imbis atong ikahadlok atong pasalamatan kay dili tanan baya ang nahatagan og igong kahigayonan nga mabuhi og dugay.

Sa paghalad nato sa atong edad pinaagi sa tugbang kantidad mas makahuloganon usab nga atong ihalad mismo ang mga maayo natong buhat aron mas malipaya ang atong magbubuhat!