Nag-mea culpa ang vendors

Adunay siyam ka manindahay ang gidid-an na sa pagpaninda sa Cebu City Night Market human mahibaw-i nga nakahimo sila ug mga kalapasan sa mga lagda nga gilatid alang kanila sa Market Operations Division. Ang salaod nga nahimo sa maong mga manindahay mao nga inay pagkaon ang ilang ibaligya, ang ilang pwesto na man hinoon ang una’ng nahalin.  Sa gidangatan karon sa siyam ka manindahay, igo na lang tingale sila sa pagpukpok sa ilang dughan dayon sa pagpamulong, “Akong sala, akong dakong sala!”.  Mirisi nila!

Segun sa balita, daghan ang kaso sa pagpatay sa tuig 2019 nga wa pa masulbad hangtud karon.  Kakulang sa testigos ug ang kalisod sa pag-ila sa suspetsado ang sagad nga mga rason sa kapolisan sa kalangay sa pagsulbad sa krimen.  Maingon ta ba diay nga mas abilidaran pa ang mga kriminal kay sa atong kapolisan? Isip-isip una mga polis.  Dili baya pilde-gana ang pagsulbad sa krimen. Hala no!

Produkto ug krimen, made in China

Segun sa talaan sa Bureau of Immigration, ang mga langyaw nga Intsik maoy nag-una sa ilang listahan sa mga langyaw nga nakahimo ug kalapasan sa atong balaod sa tuig 2019.  Dili kini ikahibulong. Mas daghan ang mga Intsik nga ania sa Pilipinas kon itandi sa ubang langyaw. Apan labaw’ng daghan ang mga produkto nga ilang gidis-og sa atong mga tindahan.  Sa Pilipinas, dili lang diay ang mga produkto “Made in China”; lakip usab ang krimen, “Made by Chinese”.  Paleho la gyud!

Dili sintedo ang punting

Buot ni Konsehal Jerry Guardo nga amendahan ang ordinansa nga nag-regulate sa pagkalot sa kadalanan sa dakbayan sa Sugbo pinaagi sa pagpasaka sa bayranan sa excavation permit nga pagalukaton unya sa mga kontraktor.  Kalangan sa paghuman sa proyekto ang hinungdan sa kahasol sa katawhan.  Mao unta kini ang angay multahan ug dako.  Daw dili sintedo ang pagpunting sa hinungdan sa pag-amendar sa maong balaodnon. Angayan pa ug dugang pag-tuon ang among ordinansa. Study pa more!

Pagtuo batok tradisyon

Miawhag ang mga kadagkoan sa Catholic Bishops Conference of the Philippines kon CBCP nga sa pagsugat nato sa bag-ong tuig 2020, dili kita mosalig sa mga patuo-tuo ug uban pa’ng mga mga dayan-dayan nga giingon magdala ug swerte.  Hinunoa, giawhag sa mga opisyales sa CBCP nga mosalig kita sa langitnong giya ug sa kaayo ug kamanggiloy-on sa Diyos.  Apan bisan pa sa maong awhag, kusog gihapon ang halin sa prutas alang sa naandang palihi.  Mao na’y giingon nga Pagtoo nga puno sa pagduha-duha.  Segurista ang tawo!

 Personal greetings

Unang gula kining maong lindog sa BALITAHOM sa tuig 2020. Busa tugoti ako nga motimbaya kaninyong tanan sa usa ka “Malipayon ug Bulahang Bag-ong Tuig” uban ang mga panghinaut sa dugang grasya ug panalangin gikan sa atong Labaw’ng Makagagagahum nga modangat sa inyong tagsa-tagsa ka panimalay. HAPPY NEW YEAR TO ALL!!!