Ang Enero 1

Matag Enero 1, tulo ka mga kasaulogan ang atong pagahimoon. Kini ang World Day of Peace, New Year diha sa atong Civil Calendar ingon man sab ang pagka Inahan sa Dios ni Maria Santisima.

Ning maong kasaulogan atong sugdan na pud ang laing hugna sa atong panaw. Ato kining tagsa tagsaon.

1. Ang kalinaw maoy usa ka panginahanglan sa matag usa kanato. buot kitang magpuyo sa kinabuhing puno sa kalinaw bahala na kun ugaling mamahimong uhaw kita sa bisan unsang material nga bahandi.

Ang mahinungdanon mao nga nindot lang gyud ang atong pagkatulog ug mamahimong nindot usab ang atong pakiglambigit sa atong isigkaingon.

2. Ang Enero maoy sinugdanan sa laing tuig sa Civil Calendar. Ang ngalan nga Enero gikan man sa pulong Januarius usa ka Roman god nga dunay duha ka mga nawong. Ang usa facing backward samtang ang usa facing forward.

Sa akong bahin nindot kaayo nga atong pamalandongan ang mga butang nga atong gihimo sa nilabay nga mga tuig.

Ang mga bati nga binuhatan atong undangon ang mga nindot atong himoon ingon nga sukaranan sa atong laing hugna sa panaw uban ang paglaum nga ang tanan mamahimong posible kun anaa ang pagtuo ug kapositibo. Face the future with optimism matud pa.

3. Sa laing bahin ang pagka inahan ni Maria nga atong gisaulog sa Enero 1 usa man ka mahinungdanong pag-angkon nga ang kaluwasan nakasulod sa kalibutan gumikan kang Maria nga andam ug taganang nihalad sa iyang kaugalingon alang natong tanan.

Ang iyang pagkamaampoon ug ang iyang pagtipig sa tanang mga panghitabo sulod sa iyang kasingkasing ang nakapahimo niya nga dalaygon labaw sa tanang kaliwatan.

Sa atong pagsugod ning laing tuig sa atong kinabuhi unta atong himoon nga malamdagan ang matag usa kanato sa dakong bili sa kalinaw nga angayan natong gambalayon sugod sa atong kaugalingon mismo.

Kay dili kita makahatag og bisan unsa kun ugaling wala nato kini mahupti. Ang makanunayong pagpamalandong sa kagahapon dako naman kaayo nga sukaranan  aron sa ingon molahutay kita sa kinabuhi nga bisan pa man dili hingpit ug puno sa kasakitan ang atong kasinatian angayan gihapon kitang moatubang niini dala ang pagtuo ug paglaum.

Ang Mahal nga Birhen padayong magdala kanato ngadto sa Iyang Anak ug pinaagi sa iyang tabang mamahimo kitang mkaambit sa tinud-anay nga diwa sa usa ka malinawon ug maampoong kinabuhi. Ang awit nagkanayon:

Bag-ong Tuig bag-ong kinabuhi! Duyog sa atong mga pagbati! Atong awiton ug atong laylayon aron magmalipayon!