Ang hiyas nga pagkama-tinabangon

Husto kaayo ang hukom ni Mayor Edgar Labella nga ang siyudad sa Sugbo motabang sa katawhan sa Medellin ug Daan-Bantayan nga nabiktima sa bagyong Ursula.

Karong buntag, si Labella ug pipila ka opisyal sa Cebu City government moadto sa duha ka lungsod sa amihanang Sugbo aron manghatag og tabang sa mga typhoon victims.

Sumala pa ni Dr. Jeffrey Ibones, ang hepe sa Department of Social Welfare and Services (DSWS), nga manghatag sila og mga bugas, trapal, sin, mineral water ug uban pa.

Ang mga sakop ni Dr. Ibones mo-coordinate sa ilang counterpart sa Medellin ug Daanbantayan aron pag-ila kon kinsa ang angay’ng hatagan sa tabang kay naguba ang ilang kabalayan.

Sigun sa report, ang Medellin ug Daanbantayan maoy nakaangkon og grabeng kadaut sa bagyong Ursula.

Sa Medellin kapin sa usa ka libo ka kabalayan ang nangaguba, ug daghan usab sa Daanbantayan.

Tukma lang nga ang siyudad sa Sugbo motabang sa mga biktima sa bagyo dinhi sa ato kay motabang man gani kita sa laing mga lugar.

Matud ni Dr. Ibones nga kapin sa 2,000 ka pamilya ang ilang mahatagan og tabang sa siyudad sa Sugbo.

* * *

Nalipay ko pagkasayod nga ilakip diay ni Konsehal Junjun Osmeña ang pagpanghawan sa aseras sa pipila ka karsada dinhi sa dakbayan, human niya mahawani ang aseras sa V.  Rama Avenue.

Matud ni Junjun nga ang mga dagkong karsada, sama sa Archbishop Reyes Avenue, Gorordo Avenue, MJ Cuenco Avenue ug ang Veterans Drive paingon sa Marco Polo Hotel gikan sa Lahug, iyang pahimoan og operation karong sunod buwan.

Diha ko nidayeg ni Junjun kay wala siya mahadlok nga dunay mga tawo nga masuko kaniya ug posible nga dili na mobotar kaniya pagbalik tungod sa iyang gihimo.

Ingon niana ang politiko nga akong gipangita ug gusto nga mohupot og mga pwesto sa kagamhanan. Susama gyud sila batasan ug ang iyang manghud nga si LTFRB-6 regional director Richie Osmeña nga kusog sab kaayong nanakop sa mga kulurum nga sakyanan.

Unta, managhan ang mga tawo sa kagamhanan nga susama kaninyo og pangisip nga serbisyo publiko ang gipasuwabi.