Ning adlaw sa Pasko

“Ning adlaw sa Pasko nga miabot may diyotay kong gasa kanimo bisan di takus, wala koy bulawan sarang ikagasa, ug wa koy pulong sarang malitok sa uban. Kining akong awit, kabus nakong awit, gihatag sa langit ug imo karon.....” Mao kini ang awit nga awiton sa matag higayon ang paghalad panahon sa mga Misa Pastorella. Salamat ni Mons. Rudy Villanueva nga nihatag og kinabuhi pinaagi sa iyang musikanhong henyo. Usa kini sa nakahatag og kadasig sa matag higayon nga saulogon ang mga Misa de Gallo.

Sa laing bahin, nahimong puno sa kahulogan kining maong awit sa paghalad. Una tungod kay ang maong awit nagpadayag man sa kamapaubsanon sa naghalad niini. Hinuon wala kitay laing mahimo gawas sa pag-angkon nga kita mismo mga kabus atubangan sa Dios ug kay kabus man wala gyud kitay atoa, bisan gani ang atong kinabuhi dili man atoa.

Dili lalim ang mga panghitabo karong paskoha. Katalagman nga wala dinhi ug wala didto. Mga panghitabo nga lisud kaayo dawaton labina kun mokalas kini og kinabuhi, modaut sa mga kabtangan, ingon man mogun-ob sa mga pangandoy.

Gani si Papa Francisco ang militok man og mga pulong sa pag-ampo alang sa tanang mga biktima sa katalagman. Ning paagiha nahimong mas makahuloganon ang pagsaulog sa Pasko sa Pagkatawo sa Ginoo labina kun bisan sa paagi nga espirituhanon kita mohimo og pagpakiglambigit kanila nga nagkalisud tawon mao nga ang atong mga pag-ampo mao ang atong ikahalad ngadto kanila.

Ang laing awit nga kabahin sa set sa pastorella nga awit mao ang awit sa kordero kun Agnus Dei. Kini nagkanayon: “Ang natawo nga bata didto sa Bethlehem, maoy nagluwas sa katawhan sa ilang mga sala! Pagatawgon siya og Emmanuel Dios nga nagpakatawo! mag-antos siya og mamatay aron kita maluwas!”

Timaan nga ang labing dakong gasa gikan sa Dios alang kanatong mga tawo mao man ang iyang bugtong anak alang kanatong mga tawo.

Wa siya’y sala apan ang maong  Anak sa Dios niambit man sa atong kahuyangon aron kita makaambit sa iyang pagka Dios. Kining maong pagbinayloay sa mga gasa maoy nihimo sa matag Pasko ingon nga makahuloganong pagsaulog ning maong pangilin.

Diyotay man tuod ang matag gasa nga atong mahatag apan kun kinasingkasing kini nan, magdala gyud kini og kahulogan alang kanatong tanan! Maayong Pasko! bisan ang linog ug bagyo dili mamahimong babag sa pagsaulog niini mga higala ko!