Ang SSS

Gigambalay ang mga pamaagi ug polisiya mahatagan lang og tukmang pagsanong ang mga suliran nga naglambigit sa kinabuhing parianon. Apil na niini ang sexual misconduct. Sa ka sensitibo niini kinahanglanon gyud ang makuting pagsusi ingon man ang pag-usisa niini. Kini aron makab-ot ang kamatuoran o dili ba kaha mahatagan og igong pagtagad ang biktima ingon man ang nagpakasala. Mao nga mahinungdanon kaayo ang SSS Kay unsa ba gud ang SSS. Ato king sabton ingon nga SINCERITY, SOLITUDE, UG SPIRITUALITY.

Sincerity diin anaa ang kamatinud-anon sa pagdawat sa sayop nga nahimo. Ang kamatinud-anon sa pag-angkon niini dili lang alang sa hingtungdan kondili usab alang sa simbahan ingon nga usa ka institusyon. Kay ang paglihay sa bisan unsang salaod nga mahimo ug sa paglubong lamang niini sa kalimot maoy makapahimo sa problema nga mas molawom ug mograbe pa hinuon.

Mao nga mahinungdanon kaayo ang makanunayong pakigkukabildo tali sa hingtungdan ug hisad-an. Ug diha sa atong pagkatawhanon kita man gyud masayop, angayan lamang nga atong dawaton ang atong sayop nga nahimo ug kun unsa man gani ang linugdangan niini ato gyud pagadawaton ug angkunon. Dili kay likayan unya ilubong na lang sa kalimot.

Solitude ug Silence. Wala kini magpasabot og “naghilomhilom lamang apan walay gihimo. Ang Solitude ug Silence nagpasabot man og pagtidlum aron pamalandongan kun ngano kini nahitabo. Apil na niini ang Sikolohikal nga sukaranan diin ang hingtungdan angayang moduaw sa iyang sikolohikal nga kahimtang sa iyang kabatan-on.

Diin naggikan ang maong unhealthy drive ug diin gikan ang maong dili himsog nga tendency. Diha lamang sa mahilom nga pagtuon ug pagsusi makahatag ang tanan sa focus kaysa magpunay og pasiatab ug pagbuhi og mga komentaryo diha sa social media nga mas makadaut pagsamot nakasala ingon man nakahatag og dakong kauwawan sa biktima.

Spirituality diin kabahin niini ang pag-angkon nga matag isyu kinahanglang pagagigyahan sa Espiritu sa Kamatuoran ug sa Gugma. Dili tuison kun unsa ang matuod ug dili maayong gambalayon ang bisan unsa nga bakak.

Matag usa kanato dunay kaakuhan ug katungdanan sa paghimog mga konkretong lakang alang sa kasulbaran ning maong suliran.  Kita dunay kaakuhan nga manginlabot sa pag-alim sa mga samad nga nahitabo tungod sa mga sexual misconduct ug uban pang mga suliran.

Dili garantiya ang pagka lantip ug pagka dungganan tungod sa mga medalya ug pasidungog nga nahuptan. Ning atong panahon karon, gipangita ang tinud-anay nga pagsaksi sa ebanghelyo pinaagi sa atong binuhatan ug pagkinabuhi. Kabahin na niini ang dakong kahigayonan nga kita mismo ingon nga simbahan ug mga tinun-an sa labaw nga Pari nga mahugawan usab gumikan sa maong kasal-anan. Kay kun unsay nabuhat sa pipila mamahimong modahig sa kadaghanan.

Sama gud sa inasal sa Carcar bisan pa man tingali og kun pipila lang ang naghinanggaw kay lagi sagulan og bahaw o bahaw na gyud ang ihatag sa mopalitay, nahimong naangin usab ang uban nga nagtinarong. Busa angayan lamang nga manginlabot gyud kita.