Ursula day dalang mensah

Ang kinaiyahan mugna sa Diyos. Ug kay Siya man ang tag-iya, mahimong sugoon ra Niya ang hangin nga pakusgan ang paghuyop-huros ug mandaran ang ulan sa pagbundak og kusog aron mamahimong bagyo ug lunop. Samot ning atong panahon, diin nagkadaghan na ang wala motuo nga dunay Ginoo.

Nalimot ang tawo, nga tanang anaa nato: talento, bahandi o salapi man, mga blessings kini gikan sa Ginoo. Busa, angay lang ipaambit-bahinbahin sa minatarong nga paagi ngadto sa mga isigkatawong nanginahanglan.

Siya ang naghatag natog puhonan. Bulahan kadtong kaantigo mopadaghan ning maong puhonan ug kaantigo mopaambit sa uban kay pun-an pa kini Niya og daghan.

Apan kon ang Iyang gibinlan dili makamao, kuhaon Niya, dili lang ang unsay Iyang gibilin kondili lakip na ang kataposang gamay nga anaa sa sulogoong walay hinungdan.

Panahon sa Pasko, busy ang katawhan pagpamutos og mga regalo. Roundtrip ticket sa barko ug eroplano, sa gikatakdang adlaw paingon sa ilaha ug pabalik sa trabaho, bisag unsa kamahal ang kantidad gipalit daan.

Litsong baboy, kalderitang kanding, steam lapulapu ug mga mahalong ilimnon para Noche Buena, tanan nakaiskedyul na nga ilang saw-an sa maong takna.

Ingon niini kabongga ang may maayong trabaho ug dunay igong suweldong ikabuga.

Apan subo paminawon nga sa kadaghang grasya nga ilang nadawat, lunlon inom, kaon, kantakanta ug uban pang matang sa lingawlingaw ra gyoy pirmeng gihunahuna, samtang ang Ginoo nga maoy naghatag nila sa tanan, gikalimtan na lang.

Daghang manguliay ang dili makatultol og simbahan aron unta magpasalamat sa Ginoo sa mga grasyang nadawat. Gani, dili kaantigo mangadye og “Bless us, oh Lord, and these Thy gifts which we are about to receive from Thy bounty, through Christ our Lord. Amen” sa dili pa mokaon sa lamiang Noche Buena nga saw-an sa pamilya dungan sa pagpanglupad sa mga fireworks nga mosugat sa pagkatawo sa Batang Hesus.

Hinungdan, nga niadtong bisperas sa Pasko, kalit lang mibutho ang bagyong Ursula sa Pilipinas, napugngan  ang liboan ka biyahedor ug napakyas sa pagpakig-ubag kaon sa ilang minahal panahon sa Noche Buena.

May pipila nga nakakita dayon sa mensahe nga gipadala sa Ginoo ni Ursula: “Sa kalipay ug kasakit, ayaw gyod pagbiya Kaniya.”