Panahon sa panudya

Human sa napulo ka tuig nga paghusay, milugwa na gayud ang desisyon sa Maguindanao massacre diin midesisyon ang korte nga guilty ang mga prime suspect sa labing ngilngig nga insidente sa pagpatay sa kasaysayan sa Pilipinas.    

Sa hukom sa korte, reclusion perpetua ang gipahamtang sa pipila sa miyembro sa pamilyang Ampatuan ug ubang akusado. Tungod sa ka grabe sa maong krimen, wala na silay tsansa nga makagawas pa sa bilanggoan.  

Morag dili mausab ang hukom sa Regional Trial Court batok sa mga konbiktado. Kini bisan pa kun moapilar pa ang mga konbiktado sa Court of Appeals hangtud na sa Korte Suprema tungod kay dili na gayud matuis pa ang ebidensiya.

Sa maong desisyon ni Judge Judge Jocelyn Solis-Reyes, midaug ang hustisya alang sa mga biktima sa labing ngilngig nga masaker sa kasaysayan sa nasud. Gani, miani kini og mga pagdayeg gikan sa mga pamilya sa mga biktima.

Sa katapusan nakab-ot na gayud nila ang dakong balos batok sa maong mga mamumuno. Lakip sa hustisya nga ilang makuha mao ang mokabat sa P155.6 milyones nga danyos bugti sa mga kinibuhi nga nakutlo sa maong masaker.  

Apan bisan pa kun mitabil na ang kurtina sa kaso sa Maguindanao massacre, pabilin kini nga anaa sa panumdoman kanatong mga Pilipino. Kini dili tungod sa ka ngilngig sa maong panghitabo kondili gumikan sa dakong leksiyon anga atong nakuha gikan sa hugaw sa pulitika sa nasud.  

Ang maong masaker maoy resulta sa ka hakog sa gahum sa atong mga pulitiko, ilabina niadtong mga political warlord didto sa Mindanao. Nahimo na kining kultura kanatong mga Pilipino sulod na sa daghang henerasyon.

Hangtud nga dili mapuo kining sa armadong dinastiya nga hagbay rang nigamot sa atong sistema sa pulitika sa Pilipinas, daghan pa nga susama sa Maguindanao massacre ang mahitabo sa nasud sa umaabot nga katuigan.

Magsilbi nga dakong leksiyon usab sa atong mga pulitiko ang pagkakonbikto sa mga Ampatuan. Kay nagpasabot kini nga bisan kun unsa ka pa ka gamhanan ug ka isog sa pulitika, moabot ra gayud ang panahon sa panudya.