Night market ihunong

Nindot bitaw nga undangon usa ang pagpahigayon og night market sa dalan Colon dinhi sa Dakbayan sa Sugbo aron nga kadtong mga nakapalit og pwesto nga gibaligya kanila og dakong kantidad, mapugos sa pagreklamo.

Basin nga sa ilang pagreklamo, itug-an nila kon kinsa ang mga tawo nga nagbaligya kanila og pwesto diha sa karsada nga anha sila mamaligya atol sa night market.

Kay kon karon lang, ambot og molampos ba kaha si Cebu City Legal Officer Rey Gealon sa pag-imbestigar.

Ako hinuon, motuo ko nga may mga tawo nga nakakuwarta sa pagpahigayon og night market, apan dili pa ko makasulti kon kinsa kini sila nga miburot ang bulsa sa kuwarta nga wala nila patuloi og singot. Awhagon nato si Mayor Edgar Labella nga ipadali niya ang imbestigasyon.

Usbon nako, sigurado gyud ko walay kasayuran niini si Mayor Labella ug nga gitonto ra siya sa pipila ka mga tawo nga kunohay motabang kaniya, apan diay ang ilang tinuoray’ng tumong mao ang personal interest.

* * *

Miabot og kapin sa P11 bilyones ang giaprobahan nga annual budget sa dakbayan sa Sugbo para sa tuig 2020. Unta, kahatagan na og bisan gamay’ng alibyo ang problema sa paglunop ug pagbaha dinhi sa siyudad.

Dakong pahat sa maong budget mahipunta sa Deppartment of Engineering and Public Works (DEPW) nga gitagana alang sa pagpalawom sa atong mga sapa, paglimpyo sa mga kanal ug paghipos sa mga basura.

Gusto gyud unta kaayo nga motabang nga mahatagan og solusyon kining mao nga problema, apan dili lang ko gusto nga mahimong empleyado sa dakbayan. Tabang lang ang ako.

Ambot, dili tingali mo makatuo nga nakainom ko og tubig baha diha sa karsada sa Bonifacio kaniadtong 1994. Naglunop diha, unya dunay lungag sa kanal nga wala mataboni.

Gipugos nako sa pagpadagan ang motor nga akong gisakyan bisan og lawom ang tubig kay aron makaabot ko sa among opisina sa The Freeman.

Pastilan, napawong bitaw ang makina sa motor, mihana og katumba ang motor, mao nga midalidali ko’g tukod. Sus, didto bitaw natumong ang akong tiil sa lungag sa imbornal, nakalad-ok lagi ko og lubog ug hugaw nga tubig sa baha.

Mao nga gusto gyud ko nga motabang pagsulbad sa problema, ug kanunay nakong gisaway ang mga nangaging opisyal nga maayo lang mosulti apan wala makasulbad sa paglunop diha.

Wala gani sila makahibawo kon ngano nga molunop man gyud dihang dapita.

Abi ninyo og ngano? Kay sulti ra man kutob nga tagdon nila ang problema sa baha, basura ug trapik.