Kabahin sa drama?
LINTUNGANAY - Fred P. Languido (Banat) - December 15, 2019 - 12:00am

Taliwa sa sibaw nga mga hungihong sa panag-uli na sa maayong kabubot-on nila ni Cebu City Vice Mayor Michael Rama ug kanhi mayor Tomas Osmena, takwahaw lang misang-at og reklamo ang kanhi mayor didto sa buhatan sa Ombudsman batok sa bise mayor.

Sentro gihapon sa reklamo mao ang kontrobersiyal nga luna sa South Road Properties nga gibaligya niadto ni Rama ngadto sa consortium sa mga gihanteng kumpaniya.

Bisan duna nay mga desisyon sa hukmanan nga mipabor sa transaksiyon, gibanhaw gihapon sa kampo ni Osmena ang kontrobersiya. Agi og tubag sa reklamong gisang-at batok niya, si Rama nagkanayon nga pagmatuod ni nga si Osmena iyang kontra ug dili higala.

Subli sab niyang gihimakak ang pasangil nga naalkansi ang dakbayan sa maong transaksiyon. Matud ni Rama nga dili sab tinuod ang mga kasayuran nga nagkauli na ang maayo nilang kabubut-on ni Osmena.

Apan ang kasaligang tinubdan nagkanayon nga duna gyuy sekretong tigom nga nahitabo tali ni Rama ug Osmena. Sumala sa tinubdan, labing minus duha na kahigayon nga nagtagbo ang duha.

Ang lain tinubdan miingon nga ang panagtagbo sa duha wala sab malilong sa kampo ni Mayor Edgardo Labella. Ang pangutana, kun tinuod nga nagka-uli na ang maayong kabubut-on nilang Osmena ug Rama, nganong nahitabo ang pagpasaka og kaso?

Ang posibilidad mao nga kabahin ni sa drama sa duha ka kampo aron paglingla sa ilang kaatbang. Kadudahan hinuon og epektibo ba ang maong drama tungod kay sukad sa sinugdan wala man sab gyud matago sa kampo ni Labella ang maong kasayuran.

Masabtan hinuon kaayo kun buhaton ni Rama ang pagpakig-alyansa pagbalik sa grupo sa BOPK. Kini tungod sa naghingapin nga ambisyon ni Rama nga mobalik pagkamayor ug sa posibilidad nga maitsapwera siya sa sunod nga eleksiyon.

Ang mga tigpaniid sa politika mitug-an nga sa wala pa ang May 2019 elections naporma nang daan kinsa ang mosunod nga kandidato pagkamayor sa kampo nilang Labella.

Ug sigun sa tinubdan, wala na maapil sa plano si Rama tungod kay gikatahong  dili siya welcome sa grupo ni Presidential Assistant for the Visayas Mike Dino.

Kun tinuod ang kasayuran, duna nay sabot ang ilang grupo nga mobalik si Labella pagkabise sa 2022 nga eleksiyon samtang dunay laing kandidato nga ituboy nga mamahimong mayor.

Mao ni hinungdan nga karon palang nangita na sab daan si Rama og pundok nga kapasilongan. Wala nay mawala ni Rama kun moipon siya balik sa BOPK tungod kay bisan unsay dangatan dako ang purohan nga si Labella maoy mamahimo niyang sunod nga kontra.

Posibling magbagat ang duha isip mga kandidato pagkamayor o ba kaha isip bise mayor sa 2022 nga eleksiyon.

DRAMA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with