God medalist sa SEAG

Grabeng panghakot og gold medals ang Pilipinas ning 30th South East Asean Games (SEAG) nga ania ipahigayon mismo sa atong nasod.

Natakpan kadtong kaulawang gipakatap sa social media sa unang adlaw nga pagpangabot sa mga bisitang langyawng atleta, kinsa matod pa, gipakaon lang kunog kikiam.

Unya, gipaantos pag dugay sa paghinulat kanus-a mahatagig room accommodation sa hotel nga giandam sa gobiyerno para kanila. Kini walay labot sa mga pasilidad nga kuno wala pa mahuman.

Hinuon, niining bag-o, gidayeg sa mga Asean countries ang Pilipinas nga maoy the best host country kuno sa tanang miaging ASEAN Games. Samot na, dihang milutaw ang tinuorayng kasingkasing sa mga Pinoy, kinsa pulidong miabiba pabor sa kaawayng mga atleta, kinsa wala pa gyud makatilawg daog.

Pun-an pa ni Filipino surfer Roger Casugay, kinsa dumadaog na sa giapilang surf competition ug dinha na duol sa gold sa kadaogan, dihang sama kakusog sa bula nga gipusgay sa mga higanteng balod, kalit lang nahanaw ang ambisiyon nga maangkon ang medalyang gold kay maoy mipasulabi kaniya ang pagluwas sa kontrang atleta, Arhip Nurnidayat, Indonesian, kang kansang kinabuhi nag-atubang sa kakuyaw human mahimulag sa iyang surfing board ug nakigkombati sa mga higanteng balod sa kamatayon.

Gumikan niini, mibaha sa social media ang Samaritanhong gihimo sa atong kababayang Roger. Kay dihang gipapili iyang galamhan asa ang mas bililhon: gold medal ba sa SEAG, o kinabuhi sa atleta? Ang pagsalbar og kinabuhi maoy iyang gigakos.

Mag-unsa mang garbo pag-angkon sa butang materyal kon ang kalipayng ikahatag matapos lamang sa mubong panahon, ikomparar sa langitnong buhat nga ang kalipayng nahatag ug madawat, forever?

Tibuok kalibotan misaludo sa bayanihong gihimo ni Roger. Daghang misiyagit-sugyot nga dapat siya ang ilhong champion sa tanang champions. Ang angay hatagag gold medal – gold medal nga mas labaw pa sa tanang gold medals sa 30th SEAG.

Gani, si Arhip Nurnidayat mismo, miisa sa kamot ni Roger ug mideklarar sa naulahi nga kampiyon. Kampiyon sa tibuok kinabuhi ni Arhip.

Natapos ang hugna sa surfing nga wala ma-gold medalist si Roger. Apan nahimo siyang God medalist dinhi sa yuta ug didto sa langit. Unta, manakod-modaghan si Roger.