No drinks, no women

Duna koy napaklian nga karaang clippings bahin sa usa ka beterano sa niaging ikaduhang gubat sa kalibutan. Ug mao  kini ang iyang tambag ngadto sa isigniya ka sundalo.

Di lang ta maghingalan dinhi kay dugay na kaayo kini nga clippings pinitsahan pa’g 2013, ug ang tawo nga atong gihisgutan dinhi, usa ka T/Sgt sa kasundalohan, nagpanuigon na’g 112.  Sa ika-116 nga sumad sa pagkamugna sa Philippine Army, iyang nadawat ang plaque of recognition “for his service to the country.”

Ang hingpit niyang tambag pagpataas sa kinabuhi: “Don’t drink alcohol (mahimo kaayo ni nato, gawas kun napalahubog na kita pag-ayo, subra na ang pagka-addict). “Don’t womanize.” Kini morag lisud ni, apan nahimo man ni sa Technical Sergeant nga atong gihisgutan dinhi.

Makapamubo diay sa kinabuhi ang pag-womanize? Padayon sa iyang tambag: “Do not forget to pray to God. He can give you a long life.”

Atong tan-aw, simple ra gyud kaayo ang iyang pagpuyo. Akong usbon for emphasis: No drinks, no womanizing, pray to God.  Ang iyang pagkaon: utan, isda ug root crops sama sa kamote. Sa iyang panahon wala pa mauso ang fast food nga mga kan-anan. So, healthy food ang kanunay niyang kan-on.

Kining bida niining atong lindog karon, ni-join sa USAFFE (United States Army Forces in the Far East) sa nagpanuigon pa’g 24, ubos sa kamanduan ni US General Douglas MacArthur, ug nakasaksi siya sa historic nga pag-landing ni MacArthur sa Leyte niadtong 1944.

Kining bayani nga atong gihisgutan dinhi, nakadawat og pasidungog, a certificate of gratitude gikan sa Presidente sa America niadtong tungora, Harry S. Truman, nadawat niadtong December 31, 1944 didto gayud sa Washington D.C.

Tipik sa citation, atong kutluon: “To you who answered the call of your country and served in the Armed Forces to bring about the total defeat of the enemy, I extend the heartfelt thanks of a grateful Nation.”

* * *

Si Hilario Caparida, ang presidente  sa Sinsin Senior Citizens Association (SSCA) maoy napiling delegado nga maoy mo-representar sa mga senior citizens sa Sinsin pagpili unya sa  pagka-OSCA Head ning dakbayan.

Usa ra ka delegado matag barangay, sa ato pa, 80 ka representante ang mopili sa pagka-Head sa OSCA, ug niining 80 ka delegado, mo-nominate sila’g tulo o lima ka delegado among themselves, ug ang mag-unang tulo ka nominees nga mapili, maoy pilian sa Mayor kinsa kanila ang itudlo pagka-OSCA Head.

Ang eleskyon pagka-delegado sa Sinsin giatol sa ilang Christmas party nga gihimong general assembly gitambongan sa kapin 200 ka senior citizens, gidumala nila ni Jeffrey Ocampo, Executive Director sa OSCA ug tinugyanan sa DSWS, sila si Ana Margarita Abadilla ug April Cardenas.

Kauban ni Caparida, ang mga bag-ong opisyales sa SSCA, naglangkob kanila ni Andres Mabala, vice president; Eustacio Dablo, secretary; Evelyn Rosales, treasurer; Pacita Baluran, auditor; ug mga PRO nga nag-representar sa 12 ka sitio, sila si Maria Yunson, Virginia Paran, Garciana Abella, Luciana dela Peña, Eduardo Paraiso, Virginia Baluran, Cristina Paran, Marelina Pareño, Laurencia Fernandez, Ramon Sumeran, Anita Garcia, ug Antonio Ragodos. Samtang ang napiling Muse si Teresita Cabarrubias, ug Prince Charming, si Ramon Sumeran.