Naumod sa tubig
Sa makausa pa, gikurihian sa mga naglibot niya ang masuk-anon nga mga tagawtaw ni Presidente Rodrigo Duterte batok sa higanteng mga negosyante nga nagapud-apod sa tubig sa Metro Manila. Niang labing balising nilang mga pasumbingay aron nga di siya mosamot og ulbo:
• Di takos ang gobiyerno nga mobanos sa pagapud-apod sa tubig sa minilyon ka mga molupyo sa Metro Manila;
• Di mahimong ibasura dayon sa Malakanyang ang mga kontrata kay ang korte ray makasugo ini; ug
• Di mga kaatbang kondili mga alyado sa presidente ang nisud sa mga kontrata.
* * *
Sukwahi sa pasangil sa presidente nga iyang mga kaatbang ang nagbudhi sa katawhan kay nakahimo og ekonomikanhong sabotahe pinaagi sa pagsud og di makiangayong mga kontrata uban sa Manila Water sa mga Ayala ug Maynilad Water Services ni Manny Pangilinan, pulos niya alyado ang iyang mga gitulisok:
• Naumol ang unang kontrata nga epektibo hangtod sa 2022 atol sa pamunoan ni kanhi Presidente Fidel Ramos niadtong 1997; ug
• Naumol ang ikaduhang kontrata nga naglugway sa unang kontrata hangtod sa 2037 atol sa pamunoan ni kanhi Presidente Gloria Macapagal-Arroyo niadtong 2009.
* * *
Si Presidente Duterte nga nagtuong mga abogado maoy labing kamao maglisod og lalis kay pulos bar topnotchers ang nitambag nga di mahimong ibalibag sa basurahan ang mga kontrata sa Manila Water ug Maynilad:
• Si Justice Secretary Menardo Guevarra nipasabot nga kinahanglang mokiha pang gobiyerno kun supakon sa Manila Water ug Maynilad ang pag-usab sa mga kontrata; ug
• Si kanhi Senate President Koko Pimentel nipatin-aw nga way negosyanteng mobubo og puhonan kun sayun-sayunon lang pagsalikway ang mga kontrata sa gobyerno.
* * *
Sa ato pa, mapugos si Presidente Duterte sa pagtun pagbalik sa mga balikas nga iyang gibugwak:
• Di diay mapasaka ang kasong economic sabotage ug kon mamugos siya maapil sa kiha ang iyang mga alyado nga silang Ramos ug Arroyo;
• Di diay niya mahimong ipabalhog dayon sa bilanggoan silang Pangilinan ug ang mga Ayala; ug
• Di diay mahimo nga sa tumang kasayon, nga sa usa lang ka pamilok, papulihon niya ang PrimeWater Infrastructure Inc. nga gipanag-iya sa iyang pinangga nga pamilya nilang kanhi Senate President Manny Villar, Senador Cynthia Villar ug DPWH Secretary Mark Villar.
* * *
- Latest
