Thermal distruction sa illegal drugs

Moabot 80 kilong illegal nga drugas nga gisunog sa PDEA ug PNP sa usa ka pasilidad sa syudad sa Naga.

Mokantidad sa 194.2 million pesos ang napaubos sa pagsunog nga naglakip sa shabu 27 kilos marijuana 52 kilos ug cocaine ug cocaine 1 kilo.

Unang gipahigayon ang hamubong briefing sa katuyoan ug ang proseso nganong gikinahanglang ipaubos sa thermal distruction ug ang proseso niini.

Kini ang mga natipigan sulod sa storage facility sa PDEA ug PNP diin nahuman na ang kaso, napatay ang naghupot sa illegal drugs ug aduna usay pagtugot sa korte.

Gani misaksi ang mga opisyal sa hudikatora pinangulohan ni executive judge Macaundas Hadjirasul.

Samtang si Governor Gwendolyn Garcia ang unang mihungit sa  drugas sa baba sa thermal machine dayon sunod ang mga opisyal sa PDEA ug PDEA ug ubang stakeholders.

Gipasabot sa plant director sa facility ang proseso nga wala gyuy aso nga mogawas ug wala say bisan gamay nga residue nga mahabilin.

Sumala sa director sa PDEA Wardley Getalla nga kadaghanan sa mga gisunog nga illegal substance gikan sa operasyon sa kapolisan.

Gipadayag usab ni Police Brigadier General Valeriano de Leon, Regional Director sa PRO7 nga aduna pay 120 kilos nga naa sa storage sa kapolisan apan nagkinahanglan pa nga ipaagi sa proseso ayha mapaubos sa distruction.

Gipahibawo sa PDEA nga duna pay mosunod nga thermal destruction nga ipahigayon ug gipaniguro sa duha ka ahensya ang luwas nga pagtipig sa mga drugas sa ilang kustodiya.

Kini taliwala sa katahap sa publiko nga basin nawala na ang mga illegal drugs nunot sa pagtumaw sa mga negatibong issue sama sa pag recycle sa illegal drugs.

Samtang bisan pa man og gipahigayon na ang pagsunog sa mga illegal substance wala gihapon magtabaw ang mga netizens.

Dihang akong gibasa ang mga comments sa social media diin na upload nako sa akong facebook page ang thermal destruction, halos negatibo gihapon kaayo ang mga komento nga puno sa pagduda.

Kaniadto nga ang marijuana lang ang gipangsunog magsige og ingon nganong ang shabu dili iapil, karon nga giapil na daghan gihapon kaayo bati nga komento.

Na hala sila na ang maayong laki kay sa atong mga otoridad nga kutob lang sa pagpanaway.

Hinoon dili man nato sila mabasol kon wala na silay pagsalig sa mga otoridad busa naa na pud na sa mga otoridad ang paghimo og mga lakang aron mabalik ang pagsalig sa katawhan sa ilang kalihokan ilabi na sa isyu sa illegal drugs.