Diyakoniya

Di pa lang dugay gihimo ang pag-ordinar sa mga bag-ong dyakono alang sa atong Artsidyosesis. Walo sila ka buok nga human sa ilang pagtungha nihimo sa ilang panaad nga moalagad gyud isip mga dyakono ning atong lokal nga simbahan.

Ang ordinasyon sa pagka dyakono mao ang sinugdanan ug haduol nga aron hingpit mahimong us aka pari. Kasagaran molanat lamang kini og mga unom ngadto siyam ka buwan. Kaniadto dili sabton nga clerical ministry ang diakonia.

Kun buot hunahunaon ang pagka dyakono nakasentro gyud sa maalagarong pagtahan sa kaugalingon alang sa mas labing ubos diha sa katilingbang Kristohanon.

Mao nga kasagaran kaniadto ang mga dyakono maoy modumala sa mga charitable works sa ilang katilingban.

Ning panahon karon, daghan sa mga tawo ang nahimong pokus ra kaayo sa bisan unsay makuha gikan sa ilang isigkaingon.

Ang pagpangalagad nahimong may katugbang nga ganti human sa maong kahago. Ang maong kahago nahimong sukaranan nga ang naghago kinahanglang dunay madawat pinasikad sa hustisya ug kaangayan.

Kay lagi ning kalibutana way luna ang mga way kahago. Ang tawong tapulan matud pa dili angay nga pakan-on.

Tinuod man tuod kini apan dili sa tanang panahon isipon ang kinabuhi ingon nga kahigayonan sa paghakgom segun sa atong gusto. Dunay mga higayon nga kita mohago apan ang maong paghago wa na magkinahanglan og balos.

Sa akong pagsuroy sa hawanan sa katedral human sa kasaulogan ang tanan nahimong hilom na usab ug nibalik ang naandang kutay sa gimbuhaton.

Dunay mga tawo nga mosulod gawas gikan sa simbahan ug nahunong na ang kagahob sa mga pasalamat ug pag abiba. nipuli ang kamingaw ug kahaw-ang.

Apan luyo ning tanan nakita ko nga bisan pa man ning utilitarian nga kalibutan nakita ko nga dunay mga tawo sa gihapon nga nakakita sa bili sa pagpaambit sa kusog sa way pagpangayo og bawos.

Dunay ni drive sa akong gisakyan kay nitambong kami og ordinasyon sa Dumaguete ang nagdumili pagdawat sa akong pahalipay dili tungod kay wa siya magkinahanglan og kwarta apan tungod kay buot lamang siyang mopaambit sa iyang kaugalingong hago makatambong lang sa maong kasaulogan. Ning panahon sa Adbiyento ang Dios nipadayag sa iyang kamanggihatagon ug kamaalagaron pinaagi sa mga maayong butang nga iyang gihatag kanato Ug ang mas konkretong paagi sa pagpakita sa atong kamapasalamaton mao man ang pagpuyo sa kinabuhing manggihatagon.

Diakonia! dia ko nia ipadala! Mao pud unta ang atong singgit aron atong mahatud ang maayong balita alang sa kadaghanan sa atong mga kaigsuonan nga mas nagkinahanglan. Dili man tuod nato masulbad ang tanang problema sa kalibutan apan makahuloganon kaayo kun kita mosuway sa paghimo og kalainan taliwala ning panahon sa kabag-ohan. Hinaut pa unta!