Si Gazini, ang promodizer ug ang kasingkasing

Sa dihang gitan-aw nako ang akong FB Account daghan ang nangindahay nga unta modaug si Gazini isip Miss Universe apan pakyas ang maong pangindahay kay bisan sa top 5 wa siya makasulod. Ang uban nag-ampo nga dunay wild card sa pamasin nga si Gazinini makakuha na lang bisan gamay niini. Apan ana gyud nang panagtigi dunay modaug ug dunay mapildi. Kabahin ra gyud na sa kinabuhi hinuon daghanan nato ang padayong nihatag sa atong pag abiba kang Gazini bisan pa man kun wa niya makuha ang korona ang mahinungdanon matud pa sa usa ka netizen nga si Gazini maoy garbo sa atong nasud.

Nahakurat ko kay dunay nawong sa babayeng nanghiwi mao diay ni ang nawong niadtong Ginang nga nanghasi og nilabay sa usa ka promodiser sa usa ka mall. Ang tanan nagsugod lang gyud sa gamay nga panaglalis.

Sa laing bahin dunay ni forward nako og video. Ang maong video naghisgot sa usa  ka batan-ong lalaki nga kun ugaling dunay maglaraw og pangdagit aron manguha og internal organs sama sa kasingkasing ang nagkanayon nga lisud na gyud kini halinon kay lagi ang maong kasingkasing samdan dako uyamot. Dayon hilak hilak siya ug tibi tibi.

Ning maong mga esena akong napamalandongan kining mosunod:

1. Sa atong kinabuhi dunay mga higayon nga daghang mga tawo ang hataas kaayo og expectation kanato ug kay taas man ang ilang expectaton kanato nga bisan pa  man kun nahimo kitang mga darling of the crowds apan kun ugaling dili nato masugat ang expectation sa uban angayan ba gyud nato ning ikasakit? Ang tubag dili. Ang mas luwas nga paagi mao man ang pagsubay sa dalan nga alang gyud nato ug dili ang dalan nga maoy pagbuot sa uban nga atong subayon.

2. Ikaduha, ang naghinobrang kapikal ug kawalay pailob maoy maghimo nato sa pagpakita og mga taras nga dili makatarunganon. Kun buot hunahunaon, daghan sa mga tawo ang immature gihapon karon. Kini tungod kay malisud alang kanila ang pagkalma panahon sa tensiyon. Ang naghinobrang tensiyon maoy nakapahimo niyang mobuto daw bulkan. Lihok nga mahimong atong mahayan sa kaulahian.

3. Ang tawong nakapunting lang sa iyang kaugalingong kapakyasan ang padayong maghambin niini sa iyang dughan. Mao nga alang niya hugot ra gyud ang tanan.

Bitaw sa atong panaw sa kinabuhi mahinungdanon kaayo nga mohamtong kita sa paagi nga gigamit nato ang gahum sa atong pagpili. Dili na mahinungdanon pang modaug si Gazini o dili ang mahinungdanon mao nga nahimo siyang kabahin sa maong panagtigi kaya ng tawo dili mahimong sukdon kun unsay iyang mahimo o pwede pang himoon sa umaabot.