Pagbadlong sa laing monopoliya
ARANGKADA - Leo Lastimosa (Banat) - December 10, 2019 - 12:00am

Gikan sa pagtunglo sa mga motorsiklo nga seryusong hulga sa trapiko, nga maoy responsable sa kasagaran sa mga aksidente sa kadalanan ug busa di gyod angay nga mamasahero, gipaluyohan sa kadagkoan sa Department of Transportation (DOTr) ang paglugway sa unom ka buwan nga eksperimento nga nagtugot sa mga motorsiklo nga mamasahero nga gitakdang mapupos na karong buwana.

Unsa may hinungdan sa pagbalitok sa DOTr? Human mo-insistir nga higpit nga ipatuman ang 55 anyos nang balaod nga nagdili sa mga motorsiklo nga mamasahero, nganong gitun man ang tanan nilang panulisok?

* * *

Nakatabang ang ka way dagkong insidente nga naglambigit sa mga habal-habal sa niaging unom ka buwan.

Wa matinuod ang pasidaan sa DOTr nga kay duha ray ligid ug paturagas nga padagan sa mga drayber sa mga motorsiklo, mameligro ang mga pasahero nga mabagnos o malamba sa dan nga mosangpot sa pagka-angol o pagkamatay.

Ambot unsa ka tinuod ang pangangkon sa Angkas, ang bugtong ride hailing company nga gipa-apil sa DOTr sa ilang eksperimento, nga 99.997% nga luwas ang ilang operasyon.

Apan sa kinatibuk-an napamatud-an nga luwas ug mapuslanon ang mga habal-habal.

* * *

Nakapugos sa DOTr pagtugot sa eksperimento sa tungatunga ning tuiga ang balaudnon sa House of Representatives paglegalisar sa habal-habal.

Kun wa pa maapsi sa panahon ang mga senador ug nakapasar sab sa ilang bersiyon sa balaudnon, mahimong legal nang mga habal-habal karon.

Daghang salamat sa paningkamot ni Kongresista Raul del Mar sa amihanang distrito sa Dakbayan sa Sugbo, ang pagpasar sa mga kongresista sa balaudnon maoy nakaduso sa DOTr pagsubli sa naandang pagsalikway sa mga habal-habal.

* * *

Ang Angkas maoy labing makapahimus sa malampusong eksperimento. Tungod sa pagbubo og puhonan sa pagbansay-bansay sa mga drayber ug paglukat og insurance sa mga pasahero, masipong sa Angkas ang mas daghang drayber sa motorsiklo karong nagkahayag nang kahigayonan nga hingpit nang tugotan ang ilang operasyon.

Apan sama sa atong kasinatian sa Grab, di maayong pasagdan nga mahimong lain nga monopoliya ang Angkas. Angayng hangpon ang karibal nga mga kompaniya.

Kinahanglan hinuon sila nga ipa-ubos sa samang makuti nga proseso nga nakapugos sa kadagkoan sa Angkas sa pagpatuman sa luwas nga sistema sa pagpamasahero sa mga motorsiklo.

* * *

leolastimosa@gmail.com    

DEPARTMENT OF TRANSPORTATION
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with