Mga bentaha sa pagduma
Nangutana ang usa namo ka suking tigpaminaw unsa may mga bentaha sa nasud nga moduma sa Southeast Asian (SEA) Games nga mao may kasagaran nga ma-kampeyon.
Gikan sa tumoy sa daginuton namong buhok, makahunahuna dayon mi sa mosunod:
• Mas suhito ang mga atleta sa venues sa ilang kaugalingong nataran;
• Mas daghan og mapada nga mga atleta kay di na man kinahanglan nga mogasto sa transportasyon ug mga pinuy-anan sa ubang kanasuran; ug alang namo ang labing dakong bentaha
• Ang kadasig ug kainit sa abiba sa mas daghang katagi-nasud nga magpunsisok sa matag duwa.
* * *
Apan wa hingpit nga mapahimusli sa Pilipinas ang iyang homecourt advantage: Kay sa tulo na ka higayon sa pagduma sa mga duwa, kausa ra ma-kampeyon, niadto rang 2005.
Napilde ang Pilipinhong mga atleta sa ilang kaugalingong nataran sa unang duha nato ka pagduma sa SEA Games niadtong 1981 ug 1991.
Ang labing daghan og pilde sa ilang homecourt mao ang Malaysia, kaupat sa unom ka higayon nga pagduma nila sa mga duwa ug ang Singapore nga napilde sa upat gyud ka higayon sa ilang pagduma. Pildero sab sa ilang homecourt ang Brunei, Laos ug Myanmar.
* * *
Maayong manalipod sa homecourt ang Thailand nga nidaog sa tanang unom ka pagduma sa SEA Games, ang Indonesia nga nidaog sa tanang upat ka pagduma ug ang Myanmar nakadaog og kaduha sa tulo ka pagduma sa mga duwa.
Kun makalahutay ang Pilipinhong mga atleta pagdominar sa nahibiling mga duwa, mahimong makuha sa Pilipinas ang ikaduhang kampeyonato sa SEA Games human sa 14 ka tuig nga huwaw. Mga timaan sa unang mga adlaw sa duwa mao nga mas dominante ang nagung-ong natong kadaogan kay sa 2005.
* * *
Labing dominante ang Thailand nga nakadaog sa 13 (45%) sa 29 ka SEA Games.
Sunod nga daogan ang Indonesia nga dunay 10 (34%).
Tagduhay daog sa Malaysia ug Myanmar. Samtang tagsa sa Pilipinas ug Vietnam.
Labing kugihang niduma sa mga duwa ang Thailand ug Malaysia, tag-unom ka SEA Games. Nagsunod ang Pilipinas, Indonesia ug Singapore, tag-upat.
Tagsa ang Brunei, Vietnam ug Laos. Wa pa kaduma ni ma-kampeyon ang Timor-Leste, kinabag-ohang sakop sa Association of Southeast Asian Nations (ASEAN).
* * *
- Latest
