Serging Osmeña

Kining awhag ni Mayor Edgar Labella paghimo’g special holiday matag Disyembre 4, pasidungog ni Serging Osmeña naghulagway sa dili niya pagka-Trapo kon pagka-Traditional politician. Kay sa daghan nang mga nanglabay nga dagkung opisyal sa atong dakbayan ug lalawigan, siya rta man si Labella ang nakahunahuna niini?

Giawhag ni Labella ang City Council pagpasar og resolusyon nga mag-aghat sa Kongreso pag-deklarar paghimo’g special Serging holiday matag Disyembre 4.

Ang kagamhanan sa Sugbo, pinaagi sa Cultural and Historical Affairs Commission (CHAC), mihandom sa ika-103 ka tuig nga sumad sa adlawng natawhan ni Serging diha sa Plaza Sugbu, nag-una sa nanambong sila si Mayor Labella ug Bise Mayor Mike Rama, mga Konsehal Donaldo Hontiveros ug Renato Osmeña, Jr.

Nitambong usab si Georgia Osmeña, anak ni Serging  ug mga ig-agaw Annie Osmeña ug Margarita Larañaga.

Matud ni Labella: “Serging Osmeña has changed a lot of lives of many people and we are now reaping the fruits of his economic accruement, his wisdom and his brand of public service.”  Pipila sa gitumbok ni Labella nga nahimo ni Serging nga nag-usab sa economic landscape s a dakbayan mao ang north reclamation project,ang unang taytayan nga nagkutay sa Opon ug mainland Cebu, ug ang airport sa Lapu-Lapu City.

Hinumdom ko, ambot pila pay akong edad niadto nga na-amused kaayo ming taga-Opon sa laraw ni Serging pagtukod og taytayan nga mag-connect sa Opon ug Sugbo.

Ang ground breaking ning maong proyekto gihimo nila ni Presidente Elpidio Quirino ug Serging. Ambut unsa tong tuiga, ug na-realized panahon na ni Presidente Ferdinand Marcos. So, angay na lang nga kapasidunggan si Serging niining pagkatukod sa Mactan-Mandaue bridge.

Kay matud ni Labella, “so that the generations to come would not forget and be reminded that it was this man, his visionary who made a difference in the lives of Cebuanos because of his economic accruement and his love for Cebu.”

Hinumdom sad ko nga nitanyag si Serging nga iyang sementohon ang kadalanan palibot tibuok lalawigan sa Sugbo on a Build-Operate-Transfer (BOT) basis, kun sa ato karong panahon: Public Private Partnership (PPP),  sama niining nagpadayon nga konstruksiyon sa Cordova-Cebu bridge. 

Naglaraw usab si Serging nga inigbalik na sa Hongkong ngadto sa mainland China, iyang ipuli ang Isla sa Mactan isip free port , sa ato pa, laing Hongkong, nga  kon na-Presidente pa si Serging, dugay na untang nahimo nga laing Hongkong ang Mactan Island.

Unya, sa iyang pagkasakop sa Lower House, mihangyo si Serging og helicopter, gamiton pag-monitor sa kahimtang sa kabukiran, among others, pagsanta sa pagka-ingin ug pagka-upaw sa bukid, ug aron ka-protektahan ang kalasangan. Sa ato pa, dili unta mo-grabe ang pag-landslide, ug pagbaha nga ato karong nasinati.

Ug kun wa ko masayop, gisugyot ni Serging nga ibalhin ang regional headquarters sa kakostablihan, Philippine Constabulary (PC) pa niadtong panahona, pagawas sa sentro sa dakbayan ngadto sa outskirts sa siyudad apan ibilin ang mga police stations.  Makatabang unta kini karon pagpaluag sa trapiko.   Busa, appropriately:  Serging Osmeña Bridge. 

Gani ang Mactan airport  mahimo nga nganlan usab og Serging Osmeña International Airport (SOIA), kay after all, siya man ang nagpabalhin sa Lahug airport ngadto sa Mactan Island.