Kagaw sa Social Media
LABTIK - Alan Domingo (Banat) - December 6, 2019 - 12:00am

Nakamugna og kabalaka ug kahadlok sa mga ginikanan ug kabataan ang huhungihong nga duna kunoy puti nga van ang mangidnap og mga bata.

Nagsugod kini sa post sa social media nga dali ra kaayong mikuyanap nga sama sa virus nga naghamok sa mga tawo kinsa dali ra usab kaayo mitoo bisan og wala pa ma-verify.

Gani mismo ako daghan ang ni personal message sa akong facebook page kon unsa ka tinood ang ilang nakita sa facebook ug naa usay mga nangutana nganong wala pa madakpi sa mga otoridad.

Naa gani usa ka OFW nga ni message ug nangutana nga angayan na ba siyang mopauli kay nahadlok lagi sa sitwasyon sa iyang anak nga basin kuno mabiktima. Pastan nalang gyud.

Ako lang usab silang giingnan nga walay sukaranan ang naasoyng impormasyon o fake news kadto nga mugna sa mga tawong walay lingaw kinsa gusto lang makahasol sa isig ka tawo.

Wala ra magdugay na trace sa kapolisan ang nagpasiugda sa false information sa social media ug ilang nadakpan didto sa dakbayan sa Danao.

Usa kini ka tinon-an kinsa miangkon sa iyang gipakatap nga bakak sa facebook o hinimo himo lang nga sugilanon.

Sa hamubo nga higayon nahimoot siya nga daghan ang ni share sa iyang post apan sa tanan lagi nga pagabuhaton duna man gyuy tugbang ug iya kining namatod-an dihang nadakpan siya.

Katarongan niya nga gihimo niya ang fake story aron mahadlok na ang mga batan-on o mga bata sa paglaag laag ilabi na panahon sa kagabhion.

Kung tan-awon medyo nisaler kay base sa usa ka report nga ang mga bata kun makakita og mga puti nga van mokaratel man sila og panagan.

Ang ingon niini nga eksina base sa pamahayag sa usa ka driver sa van rental nga na record niya sa iyang dash camera nga ang mga bata nalisang gyud.

Kinsay dili malisang nga kidnapon kuno ug kuhaan pa gyud sa mga sulod sa ginhawaan.

Ang ingon niini nga binuhatan angayan lang gyud nga tugbangan og dakong silot aron motagam ang naghimo.

Alang usab sa mga netizens dili gyud motoo dayon sa bisan unsa nga mapatik sa social media.

Sutaon kun legitimate ba ang orihinal nga nag post niini ug labaw sa tanan maghuwat sa pahibalo sa mga credible source sama sa kapolisan nga maoy otoridad sa pagpahibalo kon nahitabo ba gyud ang maong post sa social media.

Kun dili ta segurado sa atong mabasahan sa social media dili nalang sad nato i share kay nahimo ka kang kabahin sa mga iresponsableng binuhatan.

Powerful kaayo ang social media apan sa susamang higayon angayan magmatngon kay naghitak usab dinhi ang kagaw nga molamon sa mga tawo nga dili magmatngon.

SOCIAL MEDIA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with