Uban ni Bishop Dodong

Nangandam nako kay lagi piyesta man sa parokya ni SAn Francisco Javier sa Poblacion, Alegria, Cebu mao nga naligo ko kay padung naman akong molakaw. Sa dihang may niabot. Dako nakong kahikurat kay si Bishop Dodong Billiones man diay kuyog sa buotan nga dyakono ug sa iyang driver. Ang hangyo ra gyud ni Bishop: “Pwede ba nga mag-ampo ko sulod sa simbahan bisan og 3 minutes lang?” Si kinsa ba gud ko nga mobalibad niini mao nga agi sa sakristiya nilahos siya sa sulod aron mag-ampo. Ug pipila ka minutos gikan niadto nibalik siya sa gawas aron mosuroy og kadiyot sa hawanan sa simbahan ug daplin sa baybayon.

Nikuyog ko niya ngadto sa Alegria ug daghan kaayong mga maayong butang ang among gihisgotan. Ug usa sa mga gipahimug-atan niya mao nga pasalamat siya sa iyang team members sa Mandaue kay the more nga nahimong maampoon siya sa iyang kinabuhi isip obispo. Ang iyang mga kaubanan nakatabang gyud niya aron sa ingon magmaampoon gyud siya pag-ayo.

Ang maong panagtagbo nakapahinuklog baya nako sa paghimo og paghukngay sa akong kaugalingong kinabuhi sa pag-ampo. Nahimong busy ang kadaghanan kanato sa daghan kaayong mga trabaho ug mga plano nga maayo apan usahay atong nakalimtan ang bili sa Presensiya sa Ginoo diha sa atong Kinabuhi.

Usahay nahimo lamang siyang pakapin tungod kaha sa atong pagtuo nga siya langay ra kaayo kay sa atong gilauman. Mao nga nahimong routine ang pag-ampo ug ang maong pag-ampo ingon nga routine dili na kaayo motuhop sa kahiladman sa atong pagkatawo.

Sa akong paghuman og simba nisuroy ko sa mga kabalayan sa akong mga higala. Daghan kaayo kami og gihisgutan. Naglabi ang sugilanon ug mga pakatok. Bahakhak ug pahiyom akong nadungog gikan sa mga higala ug kaila. Sa dihang padulong nakong molakaw sila mahangyoon nga kun mahimo magdugay pa aron mapadayon ang limbationg kukabildo apan tungod kay daghan pa man kaayo og pagahimoon mao nga nibiya na lang ko ug wa na lang gyud magpapugong. Ug sa akong pag-abot sa kumbento dunay naghimo sa ilang santos ehersisyos ug nihimo og pagpaambit nga nagpunting sa atong katungdanan nga pasalamatan gyud ang Dios sa tanang mga kaayohan nga atong nadawat. Dili lang kay atong ipunting lang sa mga tawo ang atong pasalamat kondili sa Dios gyud mismo nga maoy tinubdan sa tanang kaayohan nga atong nasinati karon.

Laing hiyas nga batonan nato ning panahon sa Adbiyento mao man gyud ang hiyas sa pagkamaampoon. Hinundomi nga ang Pasko sa pagkatawo sa Ginoo dili lang mahitungod sa mga butang makita diha sa mga mga matahum nga mga dekorasyon kondili mahitungod usab kini sa paghimo og mas personal nga pagpatidlum ug pag-ampo diha sa kahilom.

Ang kahilom kinahanglanon aron sa ingon mahatagan og igong direksiyon ang tanan natong gipanghimo. Mamahimong dili katag ang tanan ug kay dili man katag nan nindot gyud ang resulta labina kun anaa lang gyud ang pagsakripisyo. Dili kaayo ta mogasto dili tungod kay buot kitang magtinihik hinunoa gihimo nato kini aron mas makita ang maanindot nga bulok sa Pasko sa Pagkatawo sa atong Ginoo nga bisan ang Christmas Trees ingon man mga series lights dili gyud makatupong.

Salamat ni Bishop Dodong kay sa yanong pagpamulong iyang gitudlo nga ang pag-ampo mahinungdanon ug kay mahinungdanon dili angay nga palabyon lamang.

Ang pag-ampo dunay mahimo sa kinabuhi sa tawo kay matud pang San Juan Maria Vianney, kun buot nimong maangkon ang grasya, nan pag-ampo gyud nga makanunayon.