Wa kaha’y sabotahe?
RENBOR PATROL - Rene U. Borromeo (Banat) - December 3, 2019 - 12:00am

Dugay ra gyud ko nga nagduda nga ang tubig nga gibomba sa booster pump sa MCWD diha sa duol sa main entrance sa Camp Lapu-Lapu paingon sa laing booster pump nila atubangan sa Marco Polo Plaza Hotel, gi-priority ra nila pagbomba paingon sa hotel ug duol nga kabalayan.

Mga amigo nako nga nagdumala sa booster pump dapit sa Camp Lapu-Lapu entrance, mitug-an nga kusog man kaayo ang pressure sa tubig panahon sa gabii ngadto sa kaadlawon. Apan mahibulong mi nga nagpuyo sa unahan sa Marco Polo kay wala man gyuy agas sa among lugar?

Kaniadto usa ra ka hotel ang nagbuntaog sa bukid, apan karon gawas sa Marco Polo Hotel may lain na nga tulo ka condominium nga anaa sa tupad. Diin man sila og tubig nga gigamit? Dili kaha posible nga sila maoy gi-prioritized sa MCWD sa paghatag og tubig?

Wala ba kaha sirad-i ang “valve” nga paingon diri sa Barangay Busay? Kining ako pangutana lang, kay makapaduda na gyud kaayo.

Wala man untay problema kon bisan tulo lang ka oras nga moagas ang gripo bisan kaadlawon lang, apan kon walay agas-agas sulod sa pila na ka buwan, palpak na sila sa serbisyo.

Kaniadto, giplano unta ni Rene Mercado nga mao pa ang chairman sa MCWD nga maghimo’g proyekto nga ang MCWD mokuha og tubig gikan sa sapa sa Barangay Bonbon, apan wala madayon kay unsaon man, gitudlo sa kanhi mayor si Joel Mari Yu ug giilisan si Mercado.

Gisuginlan ko ni Mercado nga giingnan siya ni Yu nga gusto gyud sa mayor nga siya maoy mag-chairman. Kay dili man burokinto nga pagkatawo si Mercado, gitugyan niya ang pagka chairman ngadto ni Yu, ug nahilom ang maong proyekto.

Mao kana ang resulta kon ipatigbabaw ang politika. Si Mercado gud, tinudlo man ni kanhi mayor Mike Rama mao nga pagdaog pagbalik ni Tommy Osmeña pagka mayor, aw gitarget dayon si Mercado.  Makaingon ko nga si Mercado “hands-on” gyud sa serbisyo kay tiaw mo, dihang may problema sa tubig diri sa amo, giari gyud niya.

Siya ang mitan-aw personal sa problema ug gipatawag ang mga opisyal sa MCWD. Ang nahitabo gud niadto mao nga may pipila ka kawani sa MCWD nga “nanguwarta.” Bisan og gidili ang paghimo og dugang koneksyon nga mokonektar sa among linya, hilom nila nga gitrabaho usa ka Sabado.

Giputol nila ang linya nga paingon sa among sityo ug gikonektar ang tulo ka linya. Sa tantong pagdali-dali, ang mga lapok nisulod sa among mga tubo ug nakabara sa pag-agas sa tubig.

Sulbad ang problema pag-ari nila ni Mercado. Kon si Yu pa to, moari kaha? 

MCWD
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with