Hinaut nga maayo og labok

Human sa nagkalainlaing kontrobersiya nga mihapak sa administrasyon ni Presidente Rodrigo Duterte kalabot sa pag-host sa Pilipinas sa 30th Southeast Asian Games, nagsugod na gayud ang labing dako nga kalihokan sa paugnat sa kusog sa rehiyon.

Nakatutok ang tibuok rehiyon sa nasud karon ug hinaut nga malampuson ang pagdumala sa kagamhanan sa SEA Games. Ang dakong kalampusan niini garbo alang sa matag usa ka Pilipino bisan pa man sa mga negatibong kasikas nga naglikos sa atong preparasyon.

Panahon na sa ceasefire sa gubot sa pulitika. Nagsiga na ang giingong kaldero nga gibatikos ni Senador Franklin Drilon gumikan kuno sa kamahal. Ug hinaut nga ang padayong siga niini maoy timaan sa walay kamatayon nga paningkamot sa atong mga atleta pagsungkit sa bulawang medalya.

Kay nagsugod na ang kompetisyon sa mga tang-an sa paugnat sa kusog sa Southeast Asia didto sa kaulohan ug New Clark City, angay lamang usab nga atong isabwag ang atong todo nga suporta ngadto sa atong mga atleta.

Niining mga kontrobersiya, dakong pangutana karon kun maapsan ba sa Pilipinas ang maayong performance niini niadtong 2005 SEA Games dinhi sa nasud. Kahinumdoman nga sa maong kompetisyon, maoy overall champion ang Pilipinas.

Hinuon, morag hangak alang sa atong mga manlalaro nga mausban pa ang maayo nilang gipakita 14 ka tuig na ang nakalabay. Dili ikalimod nga mi-level up na usab ang ubang nasud ug pursigedo usab sila nga mokumbati alang sa bulawan.

Bisan ako nagtuo nga imposible gayud nga masungkit sa Pilipinas ang overall championship sa SEA Games. Kini tungod kay daan na tang dehado batok sa ubang kanasuran nga hagbay rang mipalambo sa sektor sa ilang paugnat sa kusog.

Kini naggumikan usab sa kakulang sa suporta gikan sa atong kagamhanan, ilabina sa pinansiyal ug inprastraktura nga aspeto. Hinuon, bisan pa man niini, dako gihapon atong paglaum nga mas maayo og labok ang atong mga atleta ning kasamtangang kompetisyon.