Hulga ni Tisoy

Nipasidaan ang PAGASA nga may kahigayonan nga mahimong super typhoon si Tisoy nga gitakdang mosud na sa nasud karong adlawa, Sabado, o ugma, Domingo.

Apan bisan di mahimong super typhoon, si Tisoy mao ang kinakusgan nga bagyo nga mohasi sa nasud karong tuiga.

Di direktang maigo ni Tisoy ang Sugbo ug Central Visayas. Apan tungod sa iyang kalapad (400 ka kilometro) maapektahan ta dinhi sa Kabisay-an sa kusog niyang uwan ug hangin (sa labing uwahing banabana, niabot na og 140 ngadto sa 170 ka kilometro matag takna).

* * *

Mahimong ipaubos na sa PAGASA sa Signal Number 1 ang atong silingang rehiyon sa Eastern Visayas sugod karong Domingo.

Dungan ini, mahimong gakotan na sa mga pantalan ang fast crafts ug ubang gamayng mga sakyanan sa dagat gikan ug padung sa Sugbo ug Leyte, Southern Leyte, Biliran ug mga lalawigan sa Samar.

Kapangandaman ning daan sa mga pasahero ug mga negosyanteng may mga kargamento nga dinalian ang mga biyahe.

Mas maayong mosayo kay mahimong matanggong na sila sud sa pila ka adlaw kon magpaabot pa sa Domingo.

* * *

Labing mahulga ni Tisoy ang venues sa 30th Southeast Asian (SEA) Games nga pulos gyud maagian sa gitakda niyang ruta sa Luzon.

Ang labing bangis nga epekto sa bagyo gitakdang mabatyagan sa mga atleta gikan sa 11 ka nasud unya sa Martes (Disyembre 3) ug Miyerkules (Disyembre 4).

Nipasalig hinuon ang mga tigpasiugda nga ila nang giandam ang posibleng pagbalhin sa mga duwa sa venues nga labing mameligro sa bagyo ngadto sa alternatibong mga dapit nga mas luwas alang sa mga atleta.

Masaligon sila nga di mainat ang mga duwa lapas sa gitakdang pagtak-op unya sa Disyembre 11.

* * *

Ang gikusgon ni Tisoy, ang ika-20 nga bagyo sa nasud karong tuiga, sama sa nahaunang bangis nga mga bagyong Glenda ug Reming. Mosubay sab siya sa ilang mga ruta.

Maong gikabalak-an nga maigo ang mga dakbayan ug kalungsoran sa Silangang Kabisay-an, Metro Manila, Southern Luzon, Central Luzon ug Northern Luzon.

Pagkakaron, wa pay direktang epekto ang bagyo sa bisan asang bahin sa Pilipinas.

Ang baga nga mga panganod ug pat-ak pat-ak nga pag-uwan sa Sugbo ug Kabisay-an tungod pa sa localized thunderstorm.