Ang masulti

Pagpamalandong sa Malangkubong kaayohan

Sa dihang nahitabo ang daghang komentaryo batok kang Raffy Tulfo ingon man ang daghagn batikos kalabot sa SEA Games ug uban pa, nahigmata ako sa buhing matuod nga dinhi sa atoa nahimong mas normal ang pagsaway labina kun may makita gyud nga dili maayo o mas nahimong kataw-anan na lang ang tanan sanglit gibuhat man nato nga mas madayag pa sa  kadghanan ang atong sipyat.

Gani ang nahitabong pagsaway nahimo mang sukaranan sa akusasyon nga kitang mga hingtungdan nga nagpunay og yawit ang nahimong walay pagmahal sa nasudnong kahimtang. Mao nga alang sa uban mas maayo pang mohilom na lang kaysa mamahimong matamparos ingon nga ganti sa pagbatikos.

Tinuod, anaa ang sipyat. Bisan kinsang tawo masipyat man gyud di ba? Apan nagpasabot ba lang kini nga mohilom na lang aron di mahiagom sa mas pintas pa nga pagpanggukod? Angayan gyud nga motingog. Ingon ini gyud kita tingali dinhi sa ato.

Buot kita og kahingpitan. Tingali nakapanunod kita sa paagi nga ang mga Romanhon sa karaang panahon ang mopadayag sa ilang kahuyangan pinaagi sa pagtakuban.

Tagdugay mahuman ang mga kasaulogan kaniadto. Gani tungod sa maong kadugay, ang mga Kristiyanos ang nahimong props sa kalingawan sa mga Romanhon.Kadaghanan kanila ang nahiagom man sa mapintas nga pagpanglutos.

Atubangan sa daghang mga tawo, daghang mga Kristiyanos ang gipakaon sa mga mabangis nga mga liyon, ang uban pa gani gihimong pasuga sa hardin ni Nero.

Ang mga Romanhon nalipay niini bisan pa man kun sa sulod mismo nila, nakasinati sila og politikanhong kabalsa nga maoy hinungdan sa ilang pagkalukapa.

Sa atong panaw sa kinabuhi angayan natong himoon kining mosunod nga mga lakang aron kita magmalampuson.

1. Una ang pag-angkon nga kita mismo dunay kasaypanan. Ning maong pag-angkon kita maningkamot nga sa mga dinagkong panghitabo kita pud unta mangandam.

2. Ikaduha, dili tubag ang pagpunay og binasolay unta anaa ang tinabangay. Ang pagtinabangay mahinungdanon man apan unsaon man pagtabang kun ang makatabang unta ang wala hatagi og kahigayonan sa pagtabang?

3. Ang pagpangandam nagpasabot og kamamugnaon apan wala kini magpasabot nga bisan ang bandila sa atong nasud ang nahimong hapin sa talad kan-anan. Asa naman kaha ang lohika ning tanan?

4. Ikaupat mao nga nga sa atong kinabuhi angayan lamang nga magkat-on kita sa atong mga sayop dili kay atong himoong kahimanan ang kasaypanan kanhi aron dunay pipila nga mabulahan niini.

Daw sa nahimong lisud kaayo hunahunaon ang kasamatangan karon. Nahimong daw sa duwa duwa na lang ang tanan ug nahimong kataw-anan. Brain left the group matud pa sa usa ka netizen.

Ning paagiha nahimong kataw-anan na lang gyud tingali ang tanan. Wala tay laing masulti gawas sa paghilom sa pamasin nga ang kahilom maoy mohatag og katin-awan ning tanan natong kalibog. Kanus-a pa kaha kita makaamgo?