Bati nga impression

Imbes angkonon ang bulilyaso nalukop hinuon si House Speaker Alan Peter Cayetano og pamahid kinsay angayang basulon sa mga palpak sa preparasyon alang sa pag-host sa Pilipinas sa 30th Southeast Asian Games.

Human sa nagsunod-sunod nga mga reklamo gikan sa mga delegado sa laing kanasuran ug sa mga pagsaway nga naangkon sa PHISGOC, gibasol ni Cayetano si Senador Franklin Drilon tungod sa matud pa paglaslas sa ilang budget ug sa kalangan pagpasar niini.

Si Cayetano nga maoy pangulo sa PHISGOC, usa ka pribadong foundation nga maoy gitahasan pagdumala sa preparasyon alang sa torneyo, miingon nga ang kalangan sa Senado pagpasar sa budget maoy hinungdan nga apektado ang ilang preparasyon.

Nakalimot si Cayetano nga ang dakong hinungdan nganong nalangan ang pagpasar sa budget mao ang ilang kahakog pagsukip og P75-bilyones nga pundo alang sa ilang pork barrel. Ang SEA games dunay budget nga P7.5 bilyones, P6 bilyones niini gikan sa gobyerno samtang ang P1.5 bilyones gikan sa mga sponsors nga nakuha sa PHISGOC.

Dili problema sa budget ang hinungdan sa kapalpakan nga mitunaw kon dili prioridad sa gasto ug posibling kahakog sa mga tagdumala. Dunay seryosong problema sa prioridad sa ilang paggasto sa pundo ang PHISGOC tungod kay mas importante alang nila ang pagpatukod sa P50 milyones nga kantidad sa kaldero inay nga hatagan og igo’ng gahin ang pagkaon sa mga atleta.

Depensa ni Cayetano nganong ingon niini ka mahal ang kaldero, maghatag kuno ni og impression sa ubang mga nasud nga misalmot sa torneyo. Way lalis nga importante ang pagbilin og maayong impression sa mga dumudoong sa atong nasud, ug di sab angayang lalisan nga importante ang “branding” alang sa Pilipinas mao nga nagtukod sila og mahal kaayo nga caldero.

Apan ilang nalimtan nga labaw sa tanan importante nga lamian ug sustansiyado ang pagkaon nga atong idalit sa mga atleta. Nalimtan ba nilang Cayetano nga mas makahatag og bati nga impression sa atong nasud ang pagpasud-an lang og Kikyam ug itlog sa mga delegado?

Napugos intawn ang mga atleta sa laing kanasuran pagpalit og ilang kaugalingong pagkaon. Laing isyu sa pagkaon ug labihan ka sensitibo nga angayang gikonsiderar sa PHISGOC mao ang pagkaon sa mga atletang muslim. Way Halal nga pagkaon nga gidalit ang PHISGOC.

Kini nagpakita sa kakuwang gyud sa hibangkaagan sa PHISGOC pagdumala sa kalihukan. Ambot nganong gitugyan sa gobyerno ang pagdumala ngadto sa PHISGOC nga unta takus man ang Philippine Sports Commission paghimo niini.