Palusot nga nabuwasot
Nagsugod ang pagduma sa Pilipinas sa 30th Southeast Asian (SEA) Games pinaagi sa palusot sa budget alang sa kalihokan nga karon maoy gibasol sa daghan nga uyamot nga mga buwasot bisan wa pa pormal nga ablihi.
Gipasalig sayo ning tuiga sa pamunoan ni Presidente Rodrigo Duterte nga ang ilang pagduma maoy labing malampuson sa 60 ka tuig nang kasaysayan sa duwa nga motakdo sa talagsaong kalamposan sa iyang liderato. Dayong sugod sa SEA Games, gikuwestiyon sa atong silingang mga nasud ang batakang katakos sa mga tagduma.
* * *
Nabistong maniobra sa budget dihang giuli ni Foreign Affairs Secretary Teodoro Locsin Jr. sa Department of Budget and Management (DBM) ang P7.5 bilyones nga gahin sa SEA Games nga misteryusong gisaling-it sa Department of Foreign Affairs (DFA) sa iyang gipulihan nga si Alan Peter Cayetano.
Ambot nganong nisugot ang DBM pagbutang sa kuwarta sa DFA nga way labot sa sports. Mas kahibudngan nganong nilingiw ang kanhi pangu sa Senate Finance Committee nga si Loren Legarda.
* * *
Determinado si Cayetano pagduma sa SEA Games pinaagi sa Philippine Southeast Asian Games Organizing Committee (PHISGOC) nga siya nay nangu ini sa siya pay kalihim sa DFA ug wa buhii bisan speaker na sa House of Representatives ug gidid-an nang Presidente Duterte ang PHISGOC, nga iyang gipasanginlang kurakot, sa pagpanginlabot sa SEA Games.
Nahibaw-an sa mga senador nga P17 bilyones ang gahin sa 30th SEA Games: P7.5 bilyones sa DFA ug P9.5 bilyones sa Bases Conversion Development Authority (BCDA) nga giduma ni Vince Dizon, classmate ug kanhi chief of staff ni Cayetano.
* * *
Ang P7.5B nga gipangayo ni Cayetano gibahin sa mosunod:
P1.4B sa Sports; P1.3B sa venues; P1.5B sa games services; P107M sa medical; P368M for athletes village operations; P125M sa volunteers; P47M sa accreditation ug uniforms; P450M sa ceremonies; P296M sa media; P525M sa PR; P55M sa protocol; P566M sa administration; P38M sa human resources; P446M sa IT; ug P250M sa seguridad.
Nitiyabaw si Cayetano dihang gilaslasan ang budget ngadto sa P5B. Apan gisukwahi siyang Philippine Sports Commission (PSC) Chairman Butch Ramirez kinsa nipasalig nga igo nang P2 bilyones kay P500 milyones ray gasto sa pagduma sa Pilipinas sa SEA Games niadtong 2005.
* * *
- Latest
