Trabaho lang walay personalay

Niani og nagkadaiyang reaksyon sa mga netizens ang mga vendors nga gisita sa mga sakop sa PROBE sa dakbayan sa Sugbo.

Lakip na ang orange vendor nga gibadlong diha sa may Andres Soriano street sa Mabolo dakbayan sa Sugbo.

Sa habig sa mga sakop sa PROBE naghimo lang sila sa ilang trabaho nga maoy gisangon kanila ang pagmintinar nga walay obstruction sa kadalanan.

Gani ang sweldo sa kawani sa Probe mao man usab ang gibuhi nila sa ilang pamilya busa gikinahanglan nilang motrabaho.

Kay mao man ang mandato kanila nga mobuyag sa mga nakalapas sa lagda maong ila gyud kining buhaton.

Ang mga vendors duna usay gihuptan nga katarongan nga mao ang ilang survival, mao lang kini ang ilang gibuhi sa ilang pamilya busa bisan ka pila sila sitahon mobalik gyud sila sa naandan nilang pwesto, marka bahala sila bisan madakpan kay lagi ang mahinungdanon duna silay ikapalit og pagkaon sa ilang mga anak.

Gani ang orange vendor nga di Roy Manigos mitug-an kanako nga bisan kapila pa siya dakpon magpadayon siya sa pagpaninda kay para niya dili man krimen ang pagpanganabuhi nga tinarong.

Gawas pa wala man siya motukod og estraktura daplin sa karsada sanglit iya ra man bitbiton ang iyang mga tindang prutas.

Pareho silang dunay bug-at nga rason apan gikinahanglan seguro ang maximum tolerance o diplomasya sa pagbadlong sa mga vendors, kong madala og hangyo nga dili imbargohon ang mga tinda nga inutang ra ba pud ang capital.

Mao usag kini ang gustong nahitabo sa mayor nga dili ipasakmit ang mga tinda kay panginabuhi kini.

Kaaghop ug kalooy kuno ang ipatigbabaw sa pagpatuman sa balaod kay maminaw ra man sa kadugayan ang mga vendors.

Sa mga vendors basin pwede maminaw usab sa kamandoan gikan mismo sa presidente kay kon dili sila molihok sila usab ang mabuthan.

Labaw sa tanan magsinabtanay sila lugwayan ang taas nga pasensya kay ang tanan ra ba nga hitabo o aksyon naka record na sa camera nga sumsoman sa social media.

Pareho sila nga nanginabuhi busa magsinabtanay nalang.