Nganong gipalagpot si Robredo

Nakugang ang tanan sa dihang kalit lamang nga gipalagpot ni Presidente Rodrigo Duterte kaniadtong Dominggo si Bise Presidente Leni Robredo isip co-chairperson Inter-agency Committee on Anti-illegal Drugs o ICAD.

Wala pa gani nanginit ang sampot ni Robredo sa bag-ong posisyon nga gisangon sa presidente kaniya, nakurat na lamang kita sa balita nga gibakwi ni Duterte ang iyang katungdanan isip pangulo sa kampanya batok sa negosyo sa ilegal nga druga.

Wala kunoy salig si Duterte kang Robredo, kinsa duha pa lamang ka semana kapin sa iyang posisyon sa ICAD. Kini ang hinungdan nga nakadesider ang presidente nga bawion ang appointment sa bise presidente.

Siguro nahadlok si Duterte nga mogara na usab ang mga nalambigit sa druga niining saad ni Robredo nga wala na gyuy mamatay sa mga operasyon sa kapolisan. Gusto sa bise presidente nga tutokan ang rehabilitasyon sa mga adik ug dili ang armadong operasyon.

Ug klaro nga dili usab komportable ang administrasyon kay basin unya nga maukayan ni Robredo ang sekreto nga mga inpormayon ug mapagya unya kini ngadto sa publiko ug gamiton unya sa oposisyon sa mga atake niini batok sa administrasyon.

Kay wala may salig ang administrasyon ni Robredo, walay laing opsiyon si Duterte kun dili ang papalagpot kaniya. Ug wala pa gani manginit siya sa ang iyang lingkoranan sa ICAD, kalit lang nahanaw morag bula ang role ni Robredo sa kampanya batok sa druga.

Hinuon, sa laing bahin, dako kaayo nga sayop ang pag-assigned kang Robredo nga mangulo sa ICAD nga wala man diay salig ang presidente kaniya. Alang sa mga tigpaniid, klaro nga ill-advised ang desisyon ni Duterte pagtudlo kang Robredo.

Ug minugna na hinuon og dakong kontrobersiya kining bag-ong kalamboan. Daghan na hinuon ang nagtuo nga naunay sa kaugalingon nga tari ang administrasyon sa pagtudlo ug pagsipa kang Robredo gikan sa ICAD.