EDITORYAL - Naunsa na ni?

Daghan kaayong mga reklamo gikan sa mga foreign athletes tungod sa kawalay-ayo sa preparasyong gihimo sa Pilipinas nga maoy host karon sa ika-30 nga Southeast Asian (SEA) Games nga didto himoa sa Clark, Angeles City, Pampanga.

Gikan palang sa pagabot diha sa airport may nasugatan ng problema ang mga atleta sa mosugat kanila nga bus, sa mga hotels nga pahimutangan sa mga atleta, sa klase sa pagkaon ug uban pa.

Hasta ang foreign media gikan sa mga nasud nga sakop sa ASEAN nga mo-cover sa mga duwa nakasaway sab sa prosesong ilang giagian aron lang makakuha sa ilang accreditation sa diha sa PHISGOC (Philippine Southeast Asian Games Organizing Committee).

Tiaw mo ng hasta ilang SEA Games IDs wala gani giandam daan aron diretso nalang ihatag sa ilang pagabot.

Kanang 10 ka mga bisitang nasud mopadala gyud og mga sakop sa media gikan sa gobiyerno hasta mga pribadong nilang tv networks, radio ug newspaper outlets aron nungtan ilang mga atleta.

Kaning mga foreign media naka-cover na usab og mga events sa ubang mga nasud maong ilang gikomparar ang ilang kasinatian didto ug sa dinhi.

Sa pagkakaron, ang mga delegadong dunay mga reklamo mao ang gikan sa Myanmar, Cambodia, Timor Leste, Indonesia ug Thailand.

Gawas kanila, hasta gani ang Philippine football team nireklamo tungod gipakaon lang sila og kikiam ug itlog pares sa kan-on. Sa social media, daghan kaayong mga nanggawas nga negatibong reaksyon dili lang dinhi sa Pilipinas kondili hasta sa mga nasud diin gikan kining maong mga atleta.

Apan duna say mga netizens nga naninguhang tabunan ang kapalpakan sa PHISGOC pinaagi sa pag-post og mga fake news nga nag-ingong “nakasabot” ra ang mga bisitang mga delegado ug ang mainstream media ray naghimo og isyu.

Ang SEA Games usa ka kahigayonan sa host country nga makapanghambog kutob sa mahimo sa kung unsa ang naa siya, dili lang imprastraktura, venues, tourist destinations, kultura, tradisyon ug daghan pang uban. Naila ang Pilipinas sa pagkamaabi-abihon niini sa mga bisita, apan asa naman kini karon?