Panagtigum

Usa sa among gihimo dili pa lang dugay dinhi sa Southwest District sa mga parokya sa Sugbo mao man ang eleksyion niadtong buot namong mamahimong Vicar General, Episcopal Vicar ug Vicar Foranes. Tumong sa maong eleksiyon mao ang pagtudlo og mga kaparian nga motabang alang sa pagdumala sa pangagamhanang ecclesiastical ning atong artsiydoesis.

Apan, sa laing  bahin, nahimong ang maong panagtigom ingon nga kahigayoanan sa pakigkukabildo ug pagkumostahay sa usag usa. Dili ba nindot man kini nga kasinatian?

Dili mamahimong hingpit ang tawo kun hawa siya sa pakiglambigit. Sanglit, ang pakiglambigit mao man ang makahingpit sa matag tawo. Dugang pa, ang maong pakiglambigit mao man ang sukaranan diha sa paghatag og kahulogan sa  matag usa kanato dili ba? Kay mag-unsa man tuod kun maato ang tanan apan nahimong mas hawa kita sa kalambigitan ug pag-atiman sa tagsa tagsa kanato.

Sa akong pagsud-ong sa akong mga kaubanang kaparian, gibati ko ang kinasingkasing nga pasalamat nga ako silang gikauban bisan na lamang ning maong mga higayona. Una, tungod kay na-enjoy ko ilabina sa mga higayon nga among gipanag-ambitan ang among mga kasinatian kanhi sa seminaryo.

Nindot ang among kasinatian sa seminaryo ug gani mapasalamaton kaayo ko sa seminaryo bisan gani hangtud karon. Ang mga higayon diin usahay kami nipakita sa among kapilyo ug sa among kabugoy apan kadtong tanan nahimong kabahin na lamang sa maanindot nga kagahapon.

Sa laing bahin, ang panagtigom usa man ka paagi sa pagkumustahay kun naunsa na kita diha sa atong panaw sa kinabuhi. Di ba kun ang tawo imong giisip nga mahinungdanon, nan, imo gyud siyang kumustohanon.

Ang maong pagpangmusta usa man ka paagi sa pagpakita nga ang maong tawo bililhon og dako alang kanato. Busa angayan lamang nga atong kumustahon ang matag usa kay ang yanong pag-ingon og “hi” dako naman kaayo og kahimoan aron ang tawo makaingon nga siya bililhon.

Sa dayon nang human sa among panagtigom among gitapos ang tanan pinaagi sa pag-angkon nga kami mga edaran na gyud.  Ug kay mga edaran naman angay ug matarong lamang nga among hunahunaon kun unsay makaayo alang sa uban ug dili sa among kaugalingon.

Kay ang tawong hamtong maghunahuna sa katilingban ug maningkamot nga bisan pa man sa iyang kahuyang naningkamot siya sa paghimo kun unsay maayo alang sa uban. Magkadugay nahimo siyang selfless ug generous kanila nga mas nagkinahanglan pa kay kaniya.

 Sa dayon na nakong biya, gikahimamat ko ang usa ka iro nga gutom. Bisan pa sa iyang kagutom, nagpabilin siyang malinawon ug lambing diha sa iyang pagpangayo. Ug si kinsa man tuod ako nga makabalibad kaniya nga mas gigutom pa kay kanako.

Wa koy laing nahimo gawas sa paghatag kaniya og makaon ug gikan niadto nahimo siyang mopaduol kanako mahuwaphuwap ko lang ang iyang ulo ug nahimong daw sa malumo ra kaayo ang maong iro.