EDITORYAL - Katas ng SRP

Pagkanindot paminawon nga dunay makatrabahong 2.4 milyones ka mga Sugboanon ug makakwarta ang gobiyerno ilabi na ang Cebu City og kapin P22 bilyones gikan sa buhis kun maugmad na ang mga luna nga gipalit sa consortium sa SM Prime Holdings Inc. ug Ayala Land Inc. diha sa South Road Properties (SRP).

Apan mahitabo lang kini kun walay mga babag nga motumaw sama sa mga nahitabo sa nakalabay nga unom ka tuig.

Panahon na gyud unta aron makabenepisyo ang katawhan sa SRP kay makadaghang higayon na nga nauktaba ang mga proyekto tungod sa panagsungi sa mga opisyales sa siyudad dala sa politika.

Ang maong reclamation area hagbay rang nakompleto ug gani duna nay ubang mga negosyo nga natukod dinhi, apan atras-abante ang pagugmad sa uban pang mga balay patigayon tungod sa mga pagbabag matag bag-o ang molingkod nga mayor.

Ang kaayohang gisaad sa mga nagpasiugda sa reclamation project ngadto sa mga Sugboanon kaniadto wala gyud matuman.

Numero unong gipasaligang makabenepisyo sa pagugmad pa lamang sa SRP mao ang mga maapektohang mga gagmay nga mananagat gikan sa Duljo-Fatima hangtud na sa Inayawan.

Karon mora og nababoy na sila kay wa nay dagat nga ilang kapanagatan kay gi-reclaim naman ang kaniadto fishing grounds nga ilang gisaligan.

Hinuon tungod sa SRP niluag-luag ang problema sa trapiko ug duna nasay nagbarog nga dakong mall ug pipila ka buok nga establisimento nga karon daghang mga Sugboanon ug mga taga laing mga dapit ang nakatrabaho.

Apan mas lapad pa nga bahin sa mga luna sa SRP ang wala pa mapahimusli ug gipangtugkan nalang og mga libon ug gipuy-an og mga mananap.

Kun walay mga mobabag basta walay iregularidad lang ang pagbaligya niini, dili lang halin o buhis nga makuha ang maangkon sa siyudad.

Kay kun madugangan ang mga balay patigayon sa SRP, daghan sab mga tawo sa Sugbo ang makatrabaho ug makatampo sa ekonomikanhong kaugmaran sa Cebu City ug sa tanang mga silingan niining mga dapit.