Retribution batok reformation

Ang Komitiba sa Hustisya sa Ubos Balay Balauranan mitugot sa Balaudnon Numero 4553 nga nagwagtang sa 40 ka tuig nga limitasyon sa silot nga pagkapriso sa mga makahimo og salaud sa katilingban.

Ang chairman sa komitiba nga si Kongresista Vicente Veloso nga taga Leyte andam nga mobarog atubangan sa labaw nga hukmanan sa pagwagtang sa limitasyon kun aduna may mosupak niini.

Ang kongresista nga kanhi hukom sa Court of Appeals miingon nga ang limitasyon gitumong aron mapugngan ang dayag nga kahiwian sa sistema sa hustisya. Kini aron mahatagan og kaseguroan nga ang mga kriminal makaserbisyo gayod sa tukmang silot sa salaud nga ilang nahimo ug ang mga biktima makakuha usab sa saktong hustisya.

Segun sa Article 70 sa Revised Penal Code, ang daghan nga silot nga ipahamtang sa usa ka kriminal puwede nga sunod-sunoron niini sa pagserbisyo subay sa unsa man ang pinakadako nga silot. Apan kinahanglan nga dili kini molapas sa 40 ka tuig nga pagkapriso.

Ang balaud kriminal aduna kini duha ka tiyorya, ang klasikal ug positibista. Ang tumong sa silot klasikal mao ang retribution nga buot ipasabot nga kon ang usa ka tawo nakapatay kamatayon pod ang ipahamtang niyang silot.

Mao kini ang gibasihan sa pagpalabang sa silot kamatayon.

Ang tumong sa silot sa posibista mao ang pagreporma sa tawo nga nakahimo og krimin. Dinhi ang nakahimo og salaud wala gikonsiderar nga kriminal kun dili gikonsiderar nga masakiton busa tambalan pinaagi sa pagreporma kaniya. Mao kini ang rason ngano nga ang mga prisohan gitawag og rehabilitasyon.

Kun gusto gayod sa komitiba ni kongrsista Vicente Veloso nga maserbisyohan ang tukmang silot sa mga kriminal ug makabot ang tinuod nga hustisya sa mga biktima, nganong dili na man lang pangosgan niini ang pagpalabang sa silot kamatayon? Sa silot kamatayon makadaginot pa ang gobyerno kay sa pagpriso sa mga kriminal sulod sa taas nga higayon nga mosamot kadako ang gasto niini sa pagpakaon sa mga badlungon.