Pagpasaylo luyo sa panghimaraut

Gidawat sa mga lokal nga mag-uuma ang pagpangayo og pasaylo ni Presidente Duterte nunot sa nagkagrabe nga pagkunhod sa presyo sa ilang produkto nga palay. Apan midason sila nga kinahanglan gihapon ang konkreto nga solusyon sa ilang suliran. Nakapasaylo na ang mga hingtungdan; ang dili makapasaylo mao lamang kadtong mga “dilawan”, bisan wala sila’y gi-ugmad nga umahan. Alang kanila, kanunay’ng way ayo ang gobyerno. Faeetz!

Lig-on nga kusinero!

Gihulagway ni Albay Representative Joey Salceda nga ang kagamhanan ubos ni Presidente Duterte usa ka “authoritarian” ug lig-on nga kagamhanan ug ang “cauldron” kon kaldero nga gamiton sa SEA Games mahimong usa ka simbolo sa maong matang sa pangagamhanan.  Uyon ba kaha ang Presidente nga, inay TIGRE o di ba kaha, AGILA, kaldero na lang ang simbolo sa iyang pangagamhanan?  Buot ba ni Salcedo nga ihulagway nga kusinero ang Pangulo? Nangutana lang!

Tugob sa kinaadman

Adunay giproponer nga ordinansa ang usa ka konsehal sa dakbayan sa Talisay nga ang matag motorista magdala og chalk, krayola o uban pa’ng mga himan sa pagmarka sa kalsada.  Tuyo sa maong konsehal nga ang hingtungdang motorista mangunay pagbaglis sa nahimutangan sa iyang sakyanan atol sa disgrasya aron malikayan ang kahuot sa trapiko nga mahimong resulta sa disgrasya. Di man gani magdala og helmet ang ubang motorista, chalk na ba hinuon. Kon mapasar ang maong ordinansa, tungod sa chalk, h ayan mag-ilogay na unya ang mga habal-habal drivers pagpasakay sa maestra. Pagka-tugob sa kinaadman ang maong balaodnon. Hala no?

Dili tanan malipayon ang pasko

Usa ka ‘Malipayong Pasko’ ang nagpaabot sa mga regular ug casual nga empleyado sa Cebu City Hall human pirmahe ni Mayor Edgar Labella ang kamanduan sa paghatag sa Christmas Bonus sa mga empleyado nga mokabat ug 20 mil pesos. Sa mga empleyado nga makadawat sa maong bunos, maga-awit gayod sila sa kanta nga “JOY TO THE WORLD”; apan kadtong dili makadawat, sama sa mga Job Order, igo na lang sila sa pagtuaw sa awit nga “SILENT NIGHT”.  Sana all!

Dili maki-angayon

Adunay giduso nga balaudnon sa Senado nga dili na buhisan ang “performance incentive bonus” nga madawat sa mge empleyado sa gobyerno sa tumong nga madasig ug mahimong matinud-anon sila sa ilang gimbuhaton.

Bisan pa man sa kampanya sa gobyerno nga “Mamamayan Muna, Hindi Mamaya Na”, daghan gihapon ang empleyado nga tapulan ug walay hinungdan.  Apan tungod kay kuridas man ang paghatag sa “performance incentive bonus”, makadawat gihapon kadtong bisan walay “performance” nga empleyado.  Dili usahay maki-angayon ang kinabuhi!