Did-an gyud?

Gusto ni Presidente Duterte nga ipa-ban ang paggamit og electronics cigarette. Nakamugna kini og lainlain nga argumento gikan sa publiko kon tukma ba ang nahunahunaan sa presidente.

Ang electronics cigarette miuso kay dili kuno kini makahatag og kadaut ngadto sa mga mogamit niini. Apan dunay nagtuo nga ang pagyupyop og E-cigarette makahatag gihapon kini og kadaut sa lawas.

Samtang daghan ang misuporta sa plano ni Presidente Duterte nga i-ban ang E-cigarette kay makadaot sa panglawas, dunay nakapangutana kon nganong dili man i-ban ang sigarilyo?

Kon ako ang pangutan-on, pabor gyud ko nga idili na ang pagbaligya ug ang paggamit sa sigarilyo ug tabako.

Makapanglingo ko nga makakita sa mga mogamit og E-cigarette nga magpabuhot og baga kaayong aso nga ibugwak nila.

Sa laktod, hinambugero kaayo ang ilang gihimo. Apan kon imo sab nga hinuktokan, nganong maluoy man ta kon mangamatay kining mga tawo nga manabako ug ang mogamit og mga E-cigarette?

Ang maayo tingali nga himoon mao nga hugtan gyud ang pagdakop sa mga tawo nga manigarilyo sa duol sa laing mga tawo kay makahanggap man kini og aso gikan kanila.

Dili man kalikayan nga dunay mga hinigarilyo nga bastos kaayo, dili maghunahuna nga ang ubang tawo nga anaa sa ilang atubangan, dili hilig nga manabako ug pabuhotan ra nila sa aso.

Ang mga doktor miingon nga bisan og dili ka motabako, apan makahanggap ka sa aso sa sigarilyo, tabla ra sab ka nga nanigarilyo.

Kanang magpa-check-up ko sa doktor, mangutana gyud ang doktor kon manigarilyo ba ko, ug daygon ko niya kay dili man gyud ko motabako.

* * *

Daghan na kaayong mga karsada dinhi sa siyudad nga gipangsemento na. Ang uban niini gigastohan sa kagamhanan sa dakbayan sa Sugbo, ug ang uban sab gigastohan sa Department of Public Works and Highways (DPWH).

Apil sa mga karsada nga gipangsemento na, mao ang gikan sa kilid sa Kapitolyo paingon ngadto sa Barangay Kalunasan.

Nindot na ug lapad na ang karsada, apan ang nakaapan, kay ang walay aseras nga anha unta moagi ang mga tawo nga maglakaw.

Angay kini nga panggub-on sa kagamhanan ang kabahin sa kabalayan nga miabot na ngadto sa dapit nga para sa publiko.

Unsaon nga ang mga opisyal sa barangay nga dugay na sa pwesto, naghalhal ra man ug wala makabadlong sa mga miabuso.

Unta, kini maoy pasiugdahan nga proyekto ni Mayor Edgar Labella kay pinaagi niini, dili gyud siya makalimtan sa katawhan. Tinuod, dunay mangasuko, kadtong mga maapektohan, apan mas daghan gyud ang mangalipay.