Pabiling damgo

Mura og hayan madiskase gayud ang plano pagtukod sa national government og duha ka tulay nga magdugtong unya sa mga probinsiya sa Sugbo, Bohol ug Negros Oriental tungod sa problema sa teknikal nga aspeto niini.

Matud pa sa rehiyonal nga buhaton sa Department of Public Works and Highways, ang kalawomon sa dagat taliwala sa maong mga lalawigan maoy nakabalda sa maong mga proyekto ug hayan nga dili kini matukod.

Kini ang hinungdan, matud pa sa maong buhatan, nga wala maapil ang maong mga taytayan sa bag-ong lista sa mga dagkong proyekto ilalum sa “Build, Build, Build program sa administrasyon ni Presidente Rodrigo Duterte.

Miangkon ang maong ahensiya nga wala pay igong teknolohiya nga makahimo pagtukod sa maong mga taytayan. Kini ang hinungdan nga gipadaplin una ang project proposal, at least, ning administrasyon ni Duterte.

Sayang gayud kun dili madayon ang maong mga taytayan nga kabahin unta sa mga dagkong infrastructure projects sa kasamtangang administrasyon. Dili ikalimod nga dako og ikatabang ang maong mga tulay pagpalambo sa ekonomiya as tulo ka probinsiya sa rehiyon.

Ang nagbuntaog nga presensiya sa maong mga taytayan maoy magtuboy unya sa maong mga isla sa rehiyon ngadto sa dugang pang ekonomikanhong kalamboan, ilabina sa mga lalawigan sa Negros Oriental ug Bohol.

Kay dili ikalimod nga tungod kay sayon nang ma-access ang maong mga probinsiya, daghan na unyang mga negosyante ang interesado nga mobubo og puhonan. Usab, gipaabot nga mosaka ang bul-og sa mga turista nga mobisita sa maong mga lalawigan. Kini ilabina nga ang Bohol ug Negros Oriental maoy duha sa nag-unang tourist destinations sa nasud.

 Sayang gayud kun dili madayon ang maong mga proyekto. Hagbay ra kining maong mga tulay nga gipangandoy sa mga molupyo sa tulo ka lalawigan. Niining dili maayo nga balita, mora’g pabiling damgo lamang kining maong mga proyekto sa katawhan sa rehiyon.