Duha ka semana nga ilusyon
Ug nahuman ang duha ka semanang pagpaka aron ingnon nilang Presidente Rodrigo Duterte ug Bise Presidente Leni Robredo:
• Gipatuo ta sa presidente nga iyang hatagan sa tanang gahom ang bise presidente pagmatuod nga mas takos nga mosulbad sa problema sa ilegal nga drugas nga wa mapapas sa iyang pamunoan sa niaging kapin sa tulo ka tuig; ug
• Gipatuo ta sa bise presidente nga makahimo siya pagtabang sa presidente sa kampanya batok sa ilegal nga drugas, bisan sa tanan nilang politikanhon nga panagsungi, bisan aron lang pagluwas og usa ka inosente.
* * *
Human sa tunga gyud sa buwan niya nga pagpakahilom labot sa iyang pagtudlo ni Robredo (nga nagkinahanglan og determinado nga pagpaak sa iyang dila tungod nag-aliwaros niyang tinguha sa pagsulti sa bisan unsay masud sa iyang ulo), giklaro nang Presidente Duterte nga:
• Di gyud diay tinuod nga anti-drug czar si Robredo, kay di man siya ang magbuot unsaon sa pagpatuman sa kampanya batok sa ilegal nga drugas; ug
• Paukyab ra diay ang pasalig sa iyang pamunoan nga ang bag-ong katungdanan nga iyang gitanyag mopalingkod pagbalik ni Robredo sa gabinete.
* * *
Human sa dul-an sa duha ka semana nga paningkamot, nakaplagan sab ni Robredo nga wa diay igong pailob ang pamunoan sa pagtugot niya sa paghimo og kaugalingong hubad sa iyang mga gahom sa pagka co-chair sa Inter-Agency Committee on Anti-Illegal Drugs (ICAD):
Di diay mahimong pabasahon sa labing sensitibo nga mga dokumento sa kampanya batok sa ilegal nga drugas, apil nang listahan sa high value targets (HVTs) nga giwarawara na sa presidente sa nasudnong telebisyon.
* * *
Giduwaduwaan lang sa Philippine National Police (PNP) ug Philippine Drug Enforcement Agency (PDEA) si Robredo: Ilang gibadlong nga di manginlabot sa pag-ila ug pagdakop sa HVTs; apan ilang gi-apura pagkuyog sa aktuwal nilang mga operasyon batok sa gidudahang mga durugista.
Mahimo sang napugwat ang presidente, kon naghunahuna man nga mahimo ra niyang paundayonan bisan unsay himuon ni Robredo hangtod nga makahimo og higanteng pandol, sa pasidaan sa iyang mga magtatambag nga di pahoy ang bise presidente ug kun di magawongan dayon mahimong makatabang sa mga imbestigador sa International Criminal Court.
* * *
- Latest
