EDITORYAL - Road safety gisunod ba?

Liboan na ka mga motoristang Pilipino ang nangamatay matag tuig tungod sa aksidente sa kadalanan. Kung dili nagkabanggaanay sa laing sakyanan, nabangga sa mga estraktura ang gimanehong sakyanan maoy hinungdan sa ilang kamatayon o pagkaangol.

Ang makaguol, daghan sab mga nangamatay mga bata nga kasagaran gipasakay og motorsiklo. Niadtong tuig 2015 giingong kapin 10 mil ang nakalas dinhi sa Pilipinas tungod sa aksidente ug kapin usa ka libo niini nag-edad gikan 20-24 anyos base report gikan sa kapolisan.

Bisan gani og way makalas o angol sa mga aksidente nagbilin gihapon kini og danyos sa habig sa mga motorista tungod sa mga balayrunon sa kadaut nga ilang nahimo.

Niadtong adlaw nga Domingo, gipahinumodman sa Land Transportation Office-7 ubos sa pamunoan ni Director Emmanuel Victor Caindec ang mga motorista bahin sa road safety pinaagi sa pag-display og lungon, purlon, nagusbat nga motorsiklo ug buwak sa patay diha sa atubangan sa ilang buhatan sa N. Bacalso Avenue.

Bisan gani di na butangan pa og tarpaulin bahin sa Road Safety ang maong statics display, makasabot gyud ang mga motorista sa mensahe niini.

Una sa tanan, ang LTO maoy gitahasan sa gobiyerno kabahin sa road safety kay sa ila magsugod ang tanan.

Gikan sa paghatag og lisensya sa mga drayber, pagrehistro sa mga sakyanan ug ang paghapsay sa dagan sa trapiko. Sumala pa sa kapolisan, sagad nga hinungdan sa mga nahitabong aksidente sa kadalanan mao ang reckless driving. Walay mahitabong aksidente kun dili reckless o paturagas lang ang nagmaneho.

Ang reckless driver magpataka lang og overtake, dili mo-signal kun moliko o mobalhin og lane, magmaneho bisan hubog o sabog sa drugas ug daghan pang uban nga kung tan-awon mapugngan man unta kini kun duna silay alamag sa road safety.

Busa kinahanglan gyud nga estriktuhon sa LTO ang pag-isyu og bag-o o mag-renew og lisensya ug pangitaan sila og basic road safety certificates. Kay daghan karon sa mga drayber, gawas nga wa niini, mga bastos og hambugero pa ang uban.