Polis di magdala og armas?

May mikatap na usab nga balita, diin matod pa, nag-awhag sa kapolisan nga dili magdalag armas matag higayon sa ilang pagpakigbugno sa natad sa war on drugs. Dugay nang namatay kining notisyaha. Unya karon, nabanhaw na sab?

Tinuod kaha ning balitaa, o peke? Gitayming pa nga si Bise Presidente Leni Robredo maoy gihimo ni Presidente Rodrigo R. Duterte nga co-chairman sa Inter-Agency Committee on Anti-Illegal Drugs.

Unta, dili kini tinuod. Si Leni nailhan nang pirme mokontra sa pamaagi ni Duterte ning tulo ka tuig na niyang war on drugs sa Pilipinas. 

Kay samtang si Duterte dili mahinugon mopapatay sa mga kriminal aron lang pagsalbar sa kaugmaon ug kinabuhi sa minilyong inosente, si Robredo dili gustong patyon ang mga kriminal sa linaktod nga paagi, bahala nag mosamot kadaghan ang mga dautan ug mapun-ag laing daghan ang gipamatay sa mga aninong naulipon sa gahom sa shabu.

Sama sa Commission on Human Rights, si Robredo pabor gayod sa due process of law.

Kinahanglang ipaagi una ang gipasanginlang kriminal og due process, ayha pa hatagig tukmang silot human mamatud-ing sad-an ug hukmi sa hukmanan.

Ang pangutana: patas ba ang atong timbangan sa hustisya? Dili ba kini mokiling kon kargahag minilyong kuwarta?

Ang kahabog sa kal-ang nga nagbulag sa mga kabos batok sa tigpakaaron-ingnong kagamhanang naluoy sa mga kabos maoy buhing talan-awon nga makahatag og tukmang tubag sa maong pangutana.

Mao baya ni hinungdan nganong nauso ang riding in tandem.

Matang sa pagpatay nga naghatag og dakong tigmo sa katawhan kon kinsa gyod kini silang mamusil nga magsakayg motorsiklo?

Ang nagumon sa ginadiling drugas, gikan sa pusher ngadto na sa druglord, dili mahadlok magpakamatay ug mopatay ni bisan kinsang mapangahason nga gustong mopulbos-pukan sa nakagamot na nilang daotang negosyo ning kalibotan.

May mga polis man ganing namatay sa war on drugs operation nga hitsas pa sa mga dekalibreng armas. Unsa na kaha, kon whistle or megaphone ray ilang dad-on?

Kining awhag nga kapolisan di padad-og armas panahon sa ilang illegal drugs arrest operation, sama ra sa ipapusil-patay sila sa ilang mga dakponon.

Niadtong tawong gigikanan ning maong awhag, asa diay dapig imong kasingkasing: sa mga dakponon, o mananakop?