Jesus gazed at us with love on Christmas

May pagkabugnaw na ang hangin nga giginhawa sa kaadlawon nga mosapigad sa atong kalawasan inig gawas nato sa balay sa dili pa mobangon ang nanghuyatid nga mga bidlisiw sa sayong kabuntagon.

Timaan, nga hapit na usab moabot ang  Pasko, ang adlawng saulogon ang pagkatawo sa Batang Hesus, kinsa gipadala sa Langitnong Amahan aron tagaan tang tanang makasasala og Christmas gift nga mao: ang kaluwasan.

Unya, andam na ba kitang modawat niini? Unsa bay atong gipreparar ning Iyang pag-abot?

Mga kauban namo sa trabaho, Hulyo pa lang nagpareserba nag litsong baboy para sa Noche Buena.  Pipila kanila hinayhinay na pong namalit og mga bag-ong sinina, bino o ubang butang aron ipanghatag sa ilang mga minahal sa kinabuhi, kinugos ug mamaskohay sa ilaha. Ug usab, migahin og igong kantidad nga magasto sa ilang Christmas Party.

Agig susi, gisukna ko sila: “Sa ato pa, magsimbahan diay mo kada Domingo agig pasalamat ning grasya nga Iyang gihatag ninyo?

“Tagsa ra, Boss, uy! Lisod man god ning atong shift schedule.” Sagad nilang tubag.

Busa, gipahinumdoman ko sila: “Kana bayang kuwarta nga inyong gipalit gikan na Niya tanan. Nindot unta nga moadto tag simbahan aron Kaniya magpasalamat.” Ning panahon sa mga millennial, kadaghanan sa katawhan ingon niini ra kutob ang ilang pagpangandam alang sa Pasko. Para ra gyod sa lawasnon ang gihunahuna ug gikalimtan ang pagkaon nga para sa soul. Pipila lang kaha ang miadtong kompisalan, nangwaswas sa mga sala nga ilang nabuhat ug misaad nga hingpit nang magbag-o sa ilang kinabuhi?

Jesus gazed (nagtutok) ni Simon tulo ka higayon. Una, may gihatag Siya. Iyang himoon si Simon nga Pedro, ang Bato, diin dinhi itarok ni Hesus ang Iyang simbahan. Ug mahinangpon kining gidawat – ang pagbag-o sa iyang ngalan: gikan sa Simon ngadto sa Pedro.

Samtang kita, gitanyagan sab ni Hesus karong Pasko og kaluwasan. Apan kadaghanan misalikway niini. Pulos nahadlok mamatay aron mabuhi ug maangkon ang kaluwasan. Ang ipasabot sa mamatay dinhi mao ang pagpatay-hinulsul sa tanan tang sala aron malimpyo-buhi atong himalatyong kalag ug maangkon ang kalipayng walay kataposan.

Mao kini ang Christmas gift nga ihatag Niya nato sa Pasko. Unya, imo Siyang balibaran? Hala, ka?