EDITORYAL - Problema sa pagkolekta sa basura

Gipahibalo ni Cebu City Mayor Edgardo Labella nga posibleng iyang irekomendar ang pagpahunong na sa pag-abang sa siyudad og mga garbage trucks sa pribadong kompanya.

Ang maong mga trak sa basura nagagikan sa pribadong kompanya nga gigastohan sa siyudad og minilyon ka pesos matag tuig.

Gawas sa minilyon ka pesos ang abang sa trak lahi pa gyud ang pundo alang sa paghakot niini gikan sa transfer station padung sa sanitary landfill ug laing bayad nasab sa matag toneladang ilabay didto.

Ingon niini kadako ug kakuti ang proseso sa paglabay sa mga basura sa siyudad, ug labaw sa tanan milyones ang gigasto para lang sa abangan.

Karong bag-o, naabot na ang 21 ka mga dugang compactor trucks sa siyudad aron idugang sa kasamtangang 11 ka nagdagang mga trak sa siyudad karon.

Pinaagi niining 32 ka mga trak sa basura naghunahuna na si Labella nga irekomendar ang pagpahunong na sa pagabang sa mga garbage trucks sa mga pribadong kompanya.

Samtang tuod maayo kini nga plano kay makamenus sa gastos sa siyudad, kinahanglan tingaling dili kini dalidalion.

Kun mahitabo man, maayong gamiton ang ma-save nga pundo sa pagpalit og dugang pa gyud nga garbage compactor trucks para sa mga barangay.

Kay sa pagkakaron daghan pang mga barangay ang kuwang pa gihapon og mga garbage trucks nga mangolekta, mao nga dunay mga dagkong trak ga giabangan sa siyudad ang mosuroy sa mga barangay aron magkarga og basura.

Ning bag-o lang, gipahibalo sa siyudad ang paghatag og tag P5 milyones nga pundo sa mga barangay nga makamentinar sa kalimpyo sa ilang mga lugar.

Maayo unta kun prayoridad sa mga barangay paliton ang mini-garbage trucks ug maintenance niini. Dili kalikayan nga dunay mangaguba tungod kay sige lang dagan apan walay limpyo-limpyo maong daling tayaon.

Unya kun adto pa sa General Services Office kini ipaayo usahay madugay og kahuman maong apektado na ang koleksyon sa basura.