Bug-at nga silot aron motagam

Nag-viral na usab ang video sa nagpasad nga basura didto sa Manila bisan sa higpit nga pagpatuman sa kalimoyo ni Mayor Isko Morena.

Isip silot dili na sila pabalikon sa pagtinda sa daplin sa mga karsada diin nagpasad ang mga basura, mirese nila kay gahi man og mga ulo.

Dili nalang ta molayo pa, dinhi sa Dakbayan sa Sugbo mao gihapon ang problema ang kagahi sa ulo sa mga tawo.

Dili makahuwat nga moabot ang mga garbage trucks sa ilang mga dapit, ipanglbay na ang mga basura.

Itapok lang nila sa mga dapit nga adtoanan sa mga truck apan lagi kay dili man maadtp dayon, mabaho gyud intawon nga maghatag og hulga sa kahimsog sa katawhan.

Mipahigayon na og massive cleanup ang dakbayan apan inig talikod sa mga cleaners, ang mga molopyo maghugaw hugaw na sad.

Murag naupos na ang pailob ni Mayor Labella nga mimando sa pagpahamtang og mas bug-at nga silot sa mga tawong malapason gyud sa lagda sa paghipos sa mga basura.

Maayo unta og masampolan nga naay masilotan aron dunay mapanag-ingnan ang mga tawo nga magkinto na aron dili mapahamtangan og silot.

Ambot lang kong mosaler ba kinhi nga makapahumok sa kagahi sa ulo sa mga tawong badlongon.

Sama sa problema sa illegal drugs nga bisan giunsa na sa pag inisog nga approach sa gobierno nga misangpot na gani sa pagbanaw sa dugo, misamot naman hinoon ka grabe.

Nakaabot na ang 21 ka mga bag-ong garbage trucks nga nagkantidad og 166 milyones pesos nga magamit.

Mopalit pa usab og laing mga garbage bins nga nagkantidad og 20 Milyones pesos aron naa na gyuy kasodlan sa mga basura ang mga tawo.

Sus, kun dili kini mosaler ambot nalang, seguro mas maayong silotan ang mga gahi og ulo sa pagkaon sa ilang mga basura.

Bitaw  ang bugtong makasulbad sa problema mao ra gyud kita, magsugod aron dili na mograbe pa tungod sa dakong pagpasagad.