Ilegal nga sugal gipasagdan ra

Bisan og may kamandoan na si Mayor Edgardo Labella ngadto sa kapolisan nga hingusgan ang kampanya batok sa illegal gambling, apan hangtud karon nagpakahilom pa gihapon ang mga polis.

Mura og hinay-hinay na ko nga mitoo sa mga huhungihong nga ang nga tigpasiugda sa illegal gambling, ilabi na sa illegal swertres, naghatagan og suborno sa mga opisyal sa kapolisan.

Bugti niini, ang mga polis magpakabuta-bungol na lang sa naghitak nga mga ilegal nga sugal. Gani, si Koronel Royina Garma, nga general manager na karon sa Philippine Charity Sweepstakes Office (PCSO), nagpadala gyud og suwat ni Police Regional Director Valeriano de Leon nga naghingalan sa mga grupo, ug sa mga tawo nga giingong nagpadagan sa illegal swertres dinhi sa Sugbo.

Dinhi sa Dakbayan sa Sugbo, gidungog nga usa ka opisyal sa Police Advisory Council ang giingong nalambigit sa operasyon sa ilegal gambling.

Ambot og nganong kining maong opisyal dili man motubag kon pakighinabian sa media kabahin sa giingon nga kalambigitan niya sa operasyon sa illegal swertres.

Usa ka opisyal sa kapolisan mitug-an kanako nga dunay iyang kaila nga miduol niya ug nagdala’g P30,000 kay gipadala kuno sa maong opisyal sa Police Advisory Council isip duha ka semana niyang payola aron dili hilabtan ang illegal swertres.

Ang maayong buhaton sa acting director karon sa Cebu City Police Office ((CCPO) ang pagmando sa iyang mga sakop nga hingusgan ang kampanya batok sa illegal swertres/masiao, kun tinuod man nga wala sila magdawatan og payola gikan sa illegal gambling operators.

* * *

Gipatun-an pa ni Mayor Edgar Labella sa City Legal Office ang hangyo sa nga tag-iya og delivery trucks nga hunongon usa ang pag-impound sa ilang mga trailers nga wala marehistro sa LTO kay magparehistro pa sila.

Matud ni Labella nga mora’g dili kaayo siya mouyon sa hangyo sa mga truckers kay nganong karon ra man sila mohingusog pagparehistro sa ilang mga trailers?

Para nako, akong suportahan ang hukom ni Mayor Labella nga yam-iran kining hangyo sa kahugpongan sa mga truckers.

Nasabot nako nga gituyo gyud nila nga wala iparehistro ang ilang mga trailers kay nagtuo man sila nga mayano-yano ra nila gihapon ang mga road law enforcers.

Lahi na ang nagdumala sa CITOM sa pagka karon mao nga gihingusgan na pagpanakop ang mga dakponon nila nga units.

Go, Go, Go, traffic enforcers!!