Ang mga obra ni Mr. Wing

Nakahigayon ako og kuyog sa akong mga kaubanan sa buhat sa pagduaw sa banay nga Wing didto sa may Sta. Filomena sa Alegria. Duna silay resort nga ginganlan og Aquarius.

Sa maong yanong panihapon nahimamat pud namo ang maanyag nga si Melita gikan sa Australia. Maabi abihon usab kining bayhana. Nagkuha siya karon og masteral degree sa scuba diving mao nga nia siya karon sa Alegria ug sulod sa unom ka mga buwan kanato siya makig-uban.

Sa laing bahin gisuroy ako ni Mr. Wing sa iyang mga obra. Usa siya ka pintor ug kasagaran nga gipintalan mao man ang mga tissue paper.

Ginamit ang oil ug acrylic iyang hatagan og kinabuhi ang mga imahen nga anaa sa iyang hunahuna ug pagbati. Kay alang ni Mr. Wing ang mga drawing niya dili lang basta nga drawing kondili mga sugilanon nga iyang gimantala ginamit ang kahimanan isip pintor.

Dili lalim ang pagpintal matud pa nia kay matag obra nagkinahanglan nga tapuson sulod sa unom ka mga oras. Tiaw mo na haskang kapoya! Apan interesante kaayo ang maong panagtagbo, pun-an pa sa iyang mahal nga kapikas nga arang kamaayo diha sa pag-abi abi ug tataw kaayo sa ilang mga kinaiya nga sila mga maayong tawo diha sa ilang pakigkukabildo. Daghan mi og gipanagsultihan mahitungod sa kinabuhi sama sa mga obra ni Mr. Wing diha sa natad sa arte.

Matag butang konektado gyud motuo ko. Gani ang matag sugilanon sa kinabuhi sa tawo mahimo mang himoong inspirasyon sa matag pintor o kompositor aron ipahimugso ang usa ka obra.

Matud pa ni Mr. Wing nga diha sa iyang pagpamintora iyang gihunahuna usab ang panginahanglan sa kadaghanan o labina gyud sa masa. Kinahanglan mas makasabot sila sa maong obra ug mamahimong kabahin kini sa  ilang kinabuhi.

Mao nga buot niyang mamahimong kabahin sa kinabuhi sa uban ug ang hilom nga dapit nga ilang gipuy-an naghatag man og katagbawan sa iyang dughan ug sa iyang galamhan. Salamat kaayo ninyo mam ug sir! Daghan ako og nakat-onan!

Samtang gidala ko ang usa sa iyang mga obra sa akong lawak.

Ug sa dihang gipasiga ko ang suga, nibathay ang mga hulagway gikan sa  metikolosong imahinasyon sa pintor nga nagpahinumdom kanako nga ang kinabuhi diay usa ka arte diin atong tinguhaon ang paghimo og atong kaugalingong mga diskarte aron mapuy-an kini sa mas linain nga paagi.