Rumble strips di maoy sulbad

Gumikan sa kadanghag sa drayber, diin nakamugna hinuog dugoong aksidente sa kadalanan nga mikalas og kinabuhi, ang manggihunahunaong Talisay City Mayor Gerald Anthony ‘Samsam’ V. Gullas Jr., miawhag sa Department of Public Works and Highways nga pabutangan og rumble strips ang mga dapit sagad madisgrasyahan sa Cebu South Coastal Road isip short term solution.

Daghang tag-iyag mga sakyanan ang wala makauyon niini, kinsa nadamay lang sa mga danghag nga drayber.

Nakita man god sa mga mainampingon ug mapinanggaog sakyanan nga ang rumble strips nga ipahigda sa dalan makaguba sa mga ligid, makatay-og sa mga lingkoran ug makahiwi sa wheel balancing and alignment, diin mokaog dakong kantidad sa salapi ang pagmintin ug pagpaayo.

Sa ato pa, grabe kapurihisyo sa bulsa ang ikadulot nga apekto niining rumble strips.

Labi na karon nga ang presyo sa ligid pwerte nang mahala. Mga sentimento sa kinabag-an, nga angay usab unta iapil sa pagtimbangtimbang sa wala pa ipakanaog ang hukom sa paghimog rumble strips.

Dinhi sa siyudad sa Sugbo, aduna poy mga rumble strips nga gibanig sa pipila ka karsada. Napugngan ba ang mga disgrasya? Wala!

Kanang dalan Escario duol sa Capitol Parish, may mga rumble strips sab diha. Nahanaw ba ang vehicular accidents? Naa gihapon!

Ang Trans Central Highway, diin ang dalan nag-ikis-ikis ug sobra pa gayod katungason ug kadulhogon, may mga dapit dinhi nga gihanigan pod og rumble strips. Nahunong bang disgrasya?

May mga sakyanan gihapon nga nangahagbong sa pangpang.

Niadto lang adlaw sa mga minatay, nakaagi mi dinhig motorsiklo nga gipatikangkang sa van.

Kini nagpaila lang, nga ang rumble strips dili maoy tukmang sulbad nga mapugngan ang dugoong disgrasya sa kadalanan.

Kon ang tumong sa paggamag rumble strips mao: ‘aron maalerto ang nakatagpilaw nga drayber’, dili gyod kini garantiya nga malikayan ang disgrasya. Kay kanus-a ba maalerto ang nakatulog nga tawo?

Alang nako, ang the best solution ning problemaha mao ra gyod kining mosunod: “Kon ikaw, tsuper modrayeb, ayawg katulog.  Kon ikaw matulog, ayawg drayeb.”

Pareho ra ni sa pahimangno sa LTO: “If you drink, don’t drive. If you drive, don’t drink.”

Mao nga Mayor Samsam, please lang, ayaw na ipadayon ang paghimog rumble strips!