Nakadepende ang negosyo sa kliyente

Mao gyud ni ang angayan huna-hunaon sa mga negosyante nga ang ilang boss mao ang ilang mga kliyente o customer.

Busa angayan nga ampingan aron mahiga’m ug mobalik kinsa magdala pa og laing mga kauban aron motilaw sa produkto. Apan tungod lagi sa grabe ka hakog malimtan na kini kay ang gitinguha mao man ang dakong kita.

Sama sa nahitabo sa mga negosyante og lechon baboy sa dakbayan sa Carcar nga nasobrahan na sa kahakog sa salapi ug ganansya nalimot na hinoon sa ilang responsibilidad nga hatagan og maayong serbisyo ang mga pumapalit sa produkto.

Baha na og mabutang sa peligro ang kinabuhi sa customer sa pan-os nga lechon nga ilang gibaligya basta makahakop lang sila og kwarta.

Nawad-an na usab sila sa maayong pamatasan nga dili naman lang hatagan og kahigayonan ang mga pumapalit nga makapamili ug modesisyon sa pagpalit sa gusto.

Mangutana pa lang daan sa presyo giputos na ang lechon dayon karga sa sakyanan sa customer.

Kung mobalibad masuko ang tag iya ug manghanggat pa og sumbagay, kadtong mga dili gusto og gubot mapugos nalang sa pagpalit.

Maayo lagi unta og tinarong ang ilang serbisyo nga kadto mang bahaw nga lechon ang puston ug ihatag sa nipalit inig abot sa padulngan napan-os na.

Dugay na kaayo kining problemaha nga naaksyonan lang human nag viral sa social media ang tinonto nila.

Syaro kun walay kasayoran ang mga opisyal aning problemaha kaniadto pa apan wala gyud nila tandoga.

Asa naman diay ang market administrator wala diay siya nakasaksi sa gihimo sa mga negosyante? Maayo nalang kay naaksyonan dayon sa mayor sa Carcar City.

Basin baya og kutob lang sa kasaba og dili tinod-on aw mas mograbe pa unya ka mangtas kining mga negosyante nga nawong og kwarta.

Mga baboy gyud og kinaiya? Mas maayo pa ang baboy kay lami pa apan kining mga hakog sa kwarta ambot lang.

Miabot na gyud ang panahon nga gipaninglan na sila sa ilang gihimo busa pahigmata kini nga naa sa palad sa mga customer ang ilang kinabuhi kay kun buhian sila seguradong mahulog ug molagapak.

Maayo unta kon mausab sila ngdto sa katarong.