Buhi pa basta naay politika
BALITAHOM - Atty. Jose Marie N. Poblete (Banat) - November 7, 2019 - 12:00am

Sayop ang balita nga mikatap mahitungod sa giingon nga “kamatayon” sa kanhi senador ug mayor sa Toledo City nga si Sonny Osmena. “Buhi pa tawon ko uy,” mao kini ang pasi-aw nga tuaw sa 83 anyos nga kanhi Senador. Hayan modangat pa kini si Senador Sonny O og daghang pa’ng katuigan kay giuna-una na man pagpanganti ang iyang kamatayon. Matud pa sa usa ka komentarista sa radio, “basta naa pa’y kagaw sa politika sulod sa lawas sa tawo, buhi gihapon bisan pa’g maango-ango na.”  Hala no?

Halad mo, basura ko!

Human sa kasaulogan sa Adlaw sa mga Santos ug sa mga Kalag, gikataho nga ang Department of Public Services nakakolekta og dul-an sa 800 ka tonelada nga basura diha sa mga sementeryo sa dakbayan sa Sugbo diin sagad sa nakolekta nga basura mga laya nga bulak. Mahimo nga mamenosan ang gidaghanon sa basura kon wala na lang unta kolektaha ang mga laya’ng bulak. Matud pa bitaw sa mga titik sa usa ka awit, “Ang dahon o bulak nga laya, mapulak ra man ug mapadpad. Ug sama sa usa ka damgo, mahanaw ra kini pagmata.”  Balak pa more!

Hasta buwad, buhisan

Daghan ang mipadayag sa ilang pagsupak mahitungod sa giproponer sa DOH nga pagpatong og buhis sa mga parat nga pagkaon, sa tumong nga kini mahimong dili na sayon nga mapalit sa publiko tungod sa giingon nga kadaot nga ihatag sa parat nga pagkaon ngadto sa lawas. Sa kadaghan sa angayan atimanon sa gobyerno, ang pagbuhis na lang gyud sa ‘buwad’ ang unahon?  Matud pa bitaw sa akong higala, “Wala man gani masakit ang isda nga naglangoy-langoy ug nagpuyo gyud sa parat nga dagat.”  Pagkatoytoy!

Way makapugong sa bisyo

Sa laing bahin, adunay laraw ang Senado nga patongan og mas taas nga taripa sa buhis ang mga ilimnon nga makahubog ingon man ang sigarilyo.  Kon madayon na ang maong balaudnon, mapaabot nato nga motaas na ang presyo sa maong mga palaliton. Apan sa mga palahubog ug mga hinabako, hayan dili kini panumbalingon. Mas makunhuran pa ang budget sa konsumo sa balay kay sa budget nga itagana pagpalit sa ilimnon ug sigarilyo. Bisyo pa more!

Sama sa gambalay sa lawa

Daghang mga senador ang mipirma sa Committee Report nga nagrekomendar sa pagpasaka og kaso nga graft ug kriminal batok kang kanhi pangulo sa PNP nga si Gen. Oscar Alabayalde. Niining maong kalamboan, dako ang kahigayonan nga mapahamtangan sa silot ang naasoy’nga heneral.  Apan kon malutsan kini ni Albayalde, makatuaw na usab ang katawhan nga ang balaod sama ra sa gambalay sa lawa-lawa, ang gagmay’ng langaw ra ang malaang, molusot ra ang buyog ug bakukang. Saoonz!

POLITIKA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with